Shavkat Mirziyoyev 13-oktabr kuni Sirdaryo viloyatiga tashrifi chog‘ida viloyatning Oqoltin tumanidagi “Yangi Toshkent” mahallasini borib ko‘rdi. Bu haqda Prezident matbuot xizmati xabar berdi.
Bu yerda 130 ta kottej ta’mirlanib, kommunikatsiya tarmoqlari tiklangan. Yangi mahalla guzari, savdo va maishiy xizmat shoxobchalari, kutubxona, sport majmuasi, ichki yo‘llar qurilgan.
Prezident Shavkat Mirziyoyev qurilish va obodonlashtirish ishlarini ko‘zdan kechirdi. Aholi bilan suhbatlashdi.
“Bu yerga kelganimda vaziyat juda achinarli edi. Bu mening uyim, jigarlarim, farzandlarim, deb yuragimdan o‘tkazdim. Pul topish, tashkil qilish oson bo‘lgani yo‘q. Xudoga shukr, hammasi ortda qoldi. Bu uylar sizlarga buyursin. Endi bu obodlikni asrab, yaxshi yashab, yaxshi to‘ylar qilinglar. O‘zi mening eng katta maqsadim — yoshlarni baxtli ko‘rish”, — degan davlat rahbari.
Mahallada “Nafis liboslar” tikuvchilik korxonasi ham tashkil etilgan bo‘lib, unda 50 nafardan ziyod xotin-qiz ish boshlagan. Prezident ular bilan suhbatlashdi. “Xotin-qizlarga e’tiborni yanada kuchaytiramiz. Ayolni rozi qilolsak, jamiyatimiz fayzli bo‘ladi, hamma rejalarimizni amalga oshira olamiz”, — degan Shavkat Mirziyoyev.
Korxona kelgusi yili to‘liq quvvatga chiqqach, yiliga 500 ming dona mahsulot ishlab chiqariladi. Ularning bir qismini eksport qilish rejalashtirilgan.
Davlat rahbari, shuningdek, oilaviy poliklinikaga kirib, sog‘liqni saqlash xodimlari bilan ham suhbatlashgan.
Izoh (0)