Ijtimoiy tarmoqlarda Toshkentning Anhor kanali ustidagi piyodalar ko‘prigi ustunlari yemirilayotgani tasvirlangan suratlar tarqaldi. “O‘zbekiston temir yo‘llari” AJ Toshkentdagi mazkur piyodalar ko‘prigining holati bo‘yicha izoh berdi.
Ma’lum qilinishicha, ko‘prik tayanchlarining poydevori konstruksiyasida loyiha bo‘yicha 41 metr chuqurlikka o‘rnatilgan diametri 1500 millimetr bo‘lgan temir-beton qoziqlar ko‘zda tutilgan.
“Fotosuratlarda aynan ana shu qoziqlarning betonlangan qismi aks etgan. Qurilish texnologiyasiga ko‘ra, tayanch joylashtirilayotganida kanaldagi suvning maksimal darajasi hisobga olingan. Bunda tayanchning konstruktiv unsuri bo‘lmagan va uning yuk ko‘tarish layoqatiga ta’sir ko‘rsatmaydigan qoziq pardozlangan. U shunchaki arxitekturaviy-estetik ko‘rinish berishga mo‘ljallangan. Ushbu pardoz ko‘rinish suvning minimal darajasi hisobidan kelib chiqib ishlangan. Joriy mavsumda suv sathi sezilarli darajada pasaydi, natijada notekis yuzaga ega beton ustunlar ko‘rinib qoldi”, — deyiladi xabarda.
Ta’kidlanishicha, ushbu piyodalar ko‘prigi xavf tug‘dirmaydi hamda to‘liq soz holatda.
Avvalroq Chirchiq daryosi ustiga qurilgan ko‘prik yaroqsiz holga kelayotgani tasvirlangan video yuzasidan holat voqea joyiga borib, mutaxassislar ishtirokida o‘rganilgan edi. Ekspertlarning xulosasiga ko‘ra, ko‘prik atrofdagi shag‘al qazuvchilar sabab yaroqsiz holga kelib qolgan.
Shu yilning sentabr oxirlarida esa Surxondaryoning Qumqo‘rg‘on tumanidagi 6,5 milliard so‘mga qurib bitkazilgan ko‘prik hech qancha vaqt xizmat ko‘rsatmay qulab tushgani to‘g‘risida xabar berilgandi. Keyinroq viloyat hokimligi sifatsiz ko‘prik qurgan quruvchi ishini dastlab jinoyat ishi ochishni rad etgan transport prokuraturasi o‘rganayotganini ma’lum qilgandi.
Izoh (0)