Buxoro viloyatining Olot tumanidagi cho‘lda ikki bosh jayron ovlagan fuqaroga sud hukmi o‘qildi. Bu haqda “Daryo”ga Jinoyat ishlari bo‘yicha Qorako‘l tuman sudi raisi Jalol Sadirov ma’lum qildi.
Aniqlanishicha, 2020-yilning 16-fevral kuni 17:00 da Qashqadaryo viloyatining Mirishkor tumanida yashovchi 37 yoshli fuqaro P.A. Olot tumanida joylashgan cho‘ldan ikki bosh jayron ovlagan. Ov paytidagi miltiq ovozini eshitgan Buxoro viloyat Ekologiya va atrof-muhitni muhofaza qilish boshqarmasi xodimlari zudlik bilan voqea joyiga yetib borgan. Inspeksiya xodimlari voqea joyiga borib, ovchining ikki bosh jayronni otib nobud qilganiga guvoh bo‘lgan. Qizil kitobga kiritilgan jayronlarni otgan fuqaroning hayvonot dunyosiga 22 million 300 ming so‘m moddiy zarar yetkazgani aniqlangan va hujjatlar rasmiylashtirilgan.
Sudda so‘z olgan P.A. o‘z qilmishidan pushaymonligini bildirgan.
U Jinoyat kodeksining 202-moddasi 3-qismining “j” bandi (Hayvonot yoki o‘simlik dunyosidan foydalanish tartibini buzish) bilan aybli deb topilib, unga nisbatan 3 yil muddatga ozodlikni cheklash jazosi tayinlangan.
Shuningdek, undan viloyat Ekologiya va atrof-muhitni muhofaza qilish boshqarmasi foydasiga 22 million 300 ming so‘m zarar ham undirilib, ov quroli davlat egaligiga o‘tkazilgan.
Izoh (0)