Бухоро вилоятининг Олот туманидаги чўлда икки бош жайрон овлаган фуқарога суд ҳукми ўқилди. Бу ҳақда «Дарё»га Жиноят ишлари бўйича Қоракўл туман суди раиси Жалол Садиров маълум қилди.
Аниқланишича, 2020 йилнинг 16 февраль куни 17:00 да Қашқадарё вилоятининг Миришкор туманида яшовчи 37 ёшли фуқаро П.А. Олот туманида жойлашган чўлдан икки бош жайрон овлаган. Ов пайтидаги милтиқ овозини эшитган Бухоро вилоят Экология ва атроф-муҳитни муҳофаза қилиш бошқармаси ходимлари зудлик билан воқеа жойига етиб борган. Инспекция ходимлари воқеа жойига бориб, овчининг икки бош жайронни отиб нобуд қилганига гувоҳ бўлган. Қизил китобга киритилган жайронларни отган фуқаронинг ҳайвонот дунёсига 22 миллион 300 минг сўм моддий зарар етказгани аниқланган ва ҳужжатлар расмийлаштирилган.
Судда сўз олган П.А. ўз қилмишидан пушаймонлигини билдирган.
У Жиноят кодексининг 202-моддаси 3-қисмининг «ж» банди (Ҳайвонот ёки ўсимлик дунёсидан фойдаланиш тартибини бузиш) билан айбли деб топилиб, унга нисбатан 3 йил муддатга озодликни чеклаш жазоси тайинланган.
Шунингдек, ундан вилоят Экология ва атроф-муҳитни муҳофаза қилиш бошқармаси фойдасига 22 миллион 300 минг сўм зарар ҳам ундирилиб, ов қуроли давлат эгалигига ўтказилган.
Изоҳ (0)