Қашқадарё вилоятининг Деҳқонобод туманида тўй ўтказиш тартибини бузган 10 нафар фуқарога маъмурий баённома тузилди. Бу ҳақда «Дарё»га туман ИИБ бошлиғи ўринбосари Дилшод Мирзаев хабар берди.
Дилшод Мирзаевга кўра, туман ИИБ ходимлари томонидан ўтказилган рейд тадбирларида 9 та хонадон эгаси тўйига 30 кишидан ортиқ меҳмон чақиргани, туман марказидаги тўйхона раҳбари эса тўйхонада ўтказилган тўйда белгиланган тартибга риоя қилмаган ҳолда кўп меҳмон қатнашишига рухсат бергани маълум бўлган.
«Аниқланган ҳолатлар бўйича 10 нафар фуқарога карантин қоидаларини бузгани учун Маъмурий жавобгарлик тўғрисидаги кодекснинг 54-модда 2-қисмига асосан маъмурий баённома расмийлаштирилган ва ҳужжатлар судга юборилган», — дейди Дилшод Мирзаев.
ИИБ масъули Мирзаевнинг қўшимча қилишича, туманнинг Оқиртма қишлоғидаги хонадон эгаси тўйига 250 нафар меҳмон чақиргани аниқланган.
Ўзбекистонда коронавирус эпидемияси тарқалишининг олдини олиш мақсадида 23 мартдан эътиборан оммавий тадбирлар, хусусан, тўй-маросимларнинг ўтказилиши тақиқланган эди.
Мамлакатда эпидемиологик вазият барқарорлашиб, нисбатан назорат остига олингач Республика махсус комиссиясининг 30 майдаги қарори билан «яшил» тоифага киритилган ҳудудларда оилавий тантана, тўй, маърака ва маросимларни 30 кишидан кўп бўлмаган ҳолда ўтказишга рухсат берилди.
Мамлакатда коронавирус билан боғлиқ вазият кескинлашгани сабабли 10 июлдан бошлаб мамлакатда тўйларни ўтказиш яна тақиқланди. 15 августдан бошлаб 30 кишилик тўйларни ўтказишга яна рухсат берилди.
Эслатиб ўтамиз, аввалроқ ИИВ ахборот хизмати раҳбари Шоҳрух Ғиёсов Сирдарё вилоятида 16 та, Жиззахда 21 та, Навоийда 32 та, Бухорода 48 та, Андижонда 14 та, Наманганда 74 та, Қашқадарёда 41 та, Сурхондарёда 10 та ва Қорақалпоғистонда 27 та тўйда ҳуқуқбузарлик аниқланганини маълум қилганди.
Изоҳ (0)