Qirg‘iziston Milliy banki qarori bilan mamlakatda 7-oktabrdan transchegaraviy to‘lovlar (respublikadan tashqarida)ni amalga oshirish imkoniyatini beruvchi xalqaro to‘lov tizimlari orqali to‘lovlarni amalga oshirish to‘xtatildi, deb xabar bermoqda “Gazeta.uz”.
“Mamlakatdan kapital oqib chiqishining oldini olish uchun SWIFT transchegaraviy to‘lovlarni amalga oshirish tizimi ham o‘chirildi”, — deyiladi bank Facebook’da e’lon qilgan xabarda.
Ushbu chora-tadbirlar moliya-bank sektori xavfsizligini ta’minlash va moliya-kredit tashkilotlari aktivlarini saqlash uchun qabul qilingan. Shu sababli 6-oktabrdan Milliy bank moliya-kredit tashkilotlariga o‘z faoliyatini to‘xtatib turish va xavfsizlik choralarini kuchaytirishni tavsiya qildi.
8-oktabrdan Milliy bank moliyaviy tashkilotlarga ish haqi, pensiya, nafaqalarning o‘z vaqtida berilishi, shuningdek, aholini naqd pul bilan ta’minlash uchun sharoitlar yaratish maqsadida ish vaqtini 09:00 dan 15:00 gacha etib belgilashni tavsiya qildi.
“Mamlakat ichida naqdsiz to‘lovlarni o‘tkazishda, onlayn-xizmatlar va bankomatlar, POS-terminallar va to‘lov terminallari ishida uzluksizlik va xavfsizlikni ta’minlash bo‘yicha chora-tadbirlar qabul qilinadi”, — deyiladi bank xabarida.
Milliy bank vaziyatni kuzatmoqda, u barqarorlasha boshlasa, bank tizimi odatiy rejimda ishlashni boshlaydi, deyiladi xabarda.
Eslatib o‘tamiz, 5-okatbr kuni Bishkekda parlament saylovlari natijalariga qarshi norozilik namoyishlari bo‘lib o‘tdi. Keyinroq Markaziy saylov komissiyasi parlament saylovi natijalarini haqiqiy emas deb topdi.
Izoh (0)