AQShning Prezidentlik debatlari bo‘yicha komissiyasi (CPD) nomzodlarning keyingi debatlari qoidasiga o‘zgatirish kiritmoqchi. Bu haqda CBS telekanaliga tayanib “RBK” xabar berdi.

Foto: Getty Images

Xususan, debat moderatorlariga ishtirokchilarning mikrofonlarini o‘chirib qo‘yishga ruxsat beriladi.

Bunday qaror amaldagi prezident Donald Tramp va demokratlardan nomzod Jo Bayden 30-sentabrga o‘tar kechasi bo‘lib o‘tgan birinchi bedatda bir-birlarining gapini bir necha marta bo‘lib, shaxsiyatga o‘tib ketganidan keyin qabul qilingan.

CNN’ning yozishicha, Bayden komissiya qarorini ma’qulladi va ular nomzodlarning so‘zini bo‘lmasdan gapirish huquqini ta’minlay olishiga umid bildirdi.

Tramp saylov kampaniyasining matbuot kotibi Tim Mertau, aksincha, debat tartibiga o‘zgartirish kiritilganini qoraladi. “CPD o‘yin o‘rtasida qoidalarni o‘zgartirmasligi kerak. Ular buni kecha kechasi Jo Bayden yutqazgani uchungina qilishyapti. Prezident Trampning qo‘li baland keldi. Endi Bayden moderatorlar ishiga aralashishga harakat qilyapti”, — degan Mertau.

Eslatib o‘tamiz, AQShda prezidentlikka nomzodlarning birinchi debati 30-sentabrga o‘tar kechasi bo‘lib o‘tdi. Bahslar davomida raqiblar doimiy ravishda shaxsiyatga o‘tib ketgan. Tramp tez-tez Baydenning gapini bo‘lib qo‘ygan, buning uchun bir necha marta boshlovchi Kris Uollesdan tanbeh eshitgan, Baydenning o‘zi esa Tramp uning gapini bo‘lgan vaqtda to‘g‘ridan to‘g‘ri “Jim bo‘l, bola. Bu prezidentga yarashmaydi”, degan. Debat chog‘ida demokratlar nomzodi amaldagi prezidentni “Putinning laychasi”, yolg‘onchi, kloun va AQSh tarixidagi eng yomon prezident, deb atagan.

Ko‘plab tahlilchilarning fikricha, debatda ikkala nomzodning ham chiqishi kuchsiz bo‘ldi. Ba’zi tahlilchilar esa bu debatni “tarixdagi eng yomoni” deb atagan.

Saylovga qadar yana ikkita debat bo‘lib o‘tadi. Tramp va Baydenning ikkinchi uchrashuvi 15-oktabrda Mayamida, uchinchisi esa 22-oktabrda Neshvillda o‘tkaziladi. Bundan tashqari, vitse-prezidentlikka nomzodlar ham bitta debat o‘tkazadi.

AQSh prezidentligiga saylov esa 3-noyabr kuni bo‘lib o‘tadi.