Самарқанд вилоятида товуқ гўштидан тайёрланган кабоб истеъмол қилган 15 киши заҳарлангани ҳақида хабар берилганди. Соғлиқни сақлаш вазирлиги ҳузуридаги Санитария-эпидемиологик осойишталик ва жамоат саломатлиги хизмати мазкур ҳолат бўйича маълумот берди.
Санитария-эпидемиологик осойишталик хизмати томонидан ўтказилган эпидемиологик текширув натижасида аниқланишича, 2020 йилнинг 4 октябрь куни соат 20:00 да Самарқанд шаҳар, Зиёкорлар кўчаси 16-хонадонда шу ҳовлида боқилган товуқ гўштидан сихли кабоб тайёрланган. Кабобни оиланинг 10 нафар аъзоси ва шу хонадонда қурилиш олиб бораётган 5 нафар ишчи истеъмол қилган.
Орадан 3 соат ўтиб, кабоб истеъмол қилганларда бош оғриғи, кўнгил айниш, қайд қилиш, ҳансираш, ҳаво етишмаслиги каби клиник белгилар қайд этилган. Улар ўзларини ёмон ҳис қилгач тез тиббий ёрдамга қўнғироқ қилган.
Шундан сўнг Республика шошилинч тез ёрдам илмий марказининг Самарқанд вилояти филиалига мурожаат қилган 15 нафар фуқарога «метгемоглобин ҳосил қилувчи бирикмалардан заҳарланиш» ташхиси қўйилган ва тиббий ёрдам кўрсатилган. Эпидемиологик суриштирувлар ва зарур профилактик тадбирлар ўтказилган.
Касаллик қайд этилган хонадонда ўтказилган текширув давомида истеъмол қилинган маҳсулотлардан лаборатория таҳлилига намуналар олинган. Натижада овқатга ишлатилган туз хонадон эгаси томонидан олиб келиниб, алоҳида целлофан идишда сақланган натрий нитрат моддаси эканлиги тасдиқланган.
«Ўтказилган даво муолажаларидан сўнг клиник белгилар йўқолган, беморларнинг аҳволи яхшиланган ва уйларига жавоб берилган», — дейилади хабарда.
Аввалроқ Андижонда туғилган кун тортидан 8 киши, Қашқадарёда овқатдан 65 нафар ишчи заҳарлангани хабар қилинганди.
Изоҳ (0)