O‘zbekistonda 2021-yil 1-yanvardan jismoniy shaxslarni avtoulovlarida yo‘lovchilarni tashishga ruxsat berish taklif etilmoqda. Bu haqda Prezidentning “Yashirin iqtisodiyotni keskin qisqartirish chora-tadbirlari to‘g‘risida”gi farmoni loyihasida qayd etilgan.
Agar o‘zini o‘zi band qilganlar buyurtmalarni qabul qilish uchun mobil ilovalar (taksilar agregatorlari) yordamida yo‘lovchilarni tashisa, loyihaga ko‘ra, ijtimoiy soliq to‘lashdan tashqari, jismoniy shaxslardan olinadigan daromad solig‘i 50 foizga kamaytirilgan stavka bo‘yicha olinadi.
Farmonda Vazirlar Mahkamasiga bir oy muddatda yakka tartibdagi ish bilan band bo‘lganlar tomonidan yo‘lovchilar tashishni tashkil etishda quyidagilarni ichiga oladigan tartibini tasdiqlash topshirildi:
- tibbiy ko‘rikdan o‘tishning qulay tartibi, transport vositalarining texnik ko‘rikdan o‘tkazilishi, tashqi ko‘rinishi va jihozlanishiga qo‘yiladigan talablarni soddalashtirish;
- yorliqsiz taksilarga mijozlarni topish bo‘yicha interaktiv xizmatlarni ko‘rsatadigan ixtisoslashgan elektron dasturiy mahsulotlarda (agregatorlarda) majburiy ro‘yxatdan o‘tish;
- kontaktsiz to‘lovlar asosida o‘zaro hisob-kitoblarni amalga oshirish imkoniyati.
Mavzuga doir: O‘zbekistonda taksi faoliyati uchun litsenziyani avtomatik olish tartibi joriy etilishi mumkin
Uch yillik masalaning tarixi
Bir necha yillardan buyon O‘zbekistonda jismoniy shaxslarga taksi xizmatlarini ko‘rsatishga ruxsat berish rejalashtirilmoqda. Bu haqdagi ilk xabarlar 2017-yilning dekabr oyida chiqa boshlagan. 2017-yilda sobiq moliya vaziri Jamshid Qo‘chqorov (hozirgi bosh vazir o‘rinbosari, iqtisodiy rivojlanish va kambag‘allikni qisqartirish bo‘yicha vazir) bu haqda gapirgan edi. Bu soliq yig‘ishni ko‘payishiga, qo‘shimcha zaxiralarni aniqlashga va daromadlarni qonuniylashtirishga olib keladi deb kutilgan edi.O‘zbekiston avtomobil transporti agentligi rahbari o‘rinbosari Shoolim Shovahobov 2018-yil mart oyida O‘zbekiston avtomobil transporti agentligi hozir jismoniy shaxslarga yo‘lovchi tashish huquqini berish imkoniyatlarini ko‘rib chiqmayotganini bildirgan. Bunga sabab qilib bu holatda yo‘lovchilar va haydovchilarning hayoti xavf ostida qolishi ma’lum qilingan.
Oz muddatdan so‘ng 2018-yil aprel oyida yakka tartibdagi tadbirkorga taksi xizmatini ko‘rsatishga ruxsat berish, shuningdek, yorliqli taksilarga kassa apparatlari va radioaloqa aloqalarini o‘rnatish talablarini bekor qilishni nazarda tutuvchi Prezident farmoni loyihasi ishlab chiqildi. Biroq ushbu takliflar davlat rahbari tomonidan imzolangan farmonning so‘nggi versiyasiga kiritilmadi.
Oradan bir yil o‘tib 2019-yil bahorida yakka tartibdagi tadbirkorlarni taksi xizmatlarini ko‘rsatish uchun ruxsat berishga tayyorlanilayotgani ma’lum bo‘ldi. Shundan so‘ng Prezident bir oy ichida tegishli takliflarni tayyorlashga ko‘rsatma berdi.
Keyinroq 2019-yilning 1-iyulidan boshlab jismoniy shaxslarga yakka tartibdagi tadbirkor sifatida yorliqli taksilar orqali yo‘lovchilarni tashish bo‘yicha xizmatlar ko‘rsatishga ruxsat berish taklif qilindi. Ammo loyiha oxir-oqibat qabul qilinmadi.
Yana bir yil o‘tib Shavkat Mirziyoyev ishtirokida 2020-yil 19-may kuni o‘tkazilgan yig‘ilishda o‘zini o‘zi band qilayotgan, kasb-hunari bor odamlarga munosib sharoit yaratish maqsadida yangi tizim joriy etilishi belgilandi. Yig‘ilishda Prezident tomonidan taksi haydovchilari ham daromad solig‘idan ozod etilishi qayd etib o‘tilgandi. Biroq iyun boshlaridan o‘zini o‘zi band qilgan shaxslar shug‘ullanishi mumkin bo‘lgan faoliyat turlari ko‘paygan, lekin ular orasida Prezident aytgan taksichilar yo‘q edi.
Izoh (0)