O‘zbekistonda Kia’ning hech qayerda bo‘lmagan eksklyuziv avtomobili ishlab chiqarilishi kutilmoqda. “Gazeta.uz”ning xabar berishicha, bu haqda 5-oktabr kuni Toshkentning Sergeli tumanidagi Kia Motors avtosalonida Kia Seltos va Kia K5 avtomobillari taqdimotida ma’lum qilingan.
Qayd etilishicha, Roodell kompaniyasi biznes-rejasi va rivojlanish strategiyasiga ko‘ra har chorakda bitta Kia modelini ishlab chiqarish rejalashtirilgan. Bu ikki bosqichda amalga oshiriladi.
“Ikkinchi bosqichda biz butunlay boshqa turdagi hali hech qayerda ishlab chiqarilmagan va MDHda ham namoyish etilmagan avtomobil ishlab chiqaramiz. U butun O‘zbekiston uchun eksklyuziv ravishda butun mintaqa uchun ishlab chiqariladigan yangi Kia mahsuloti bo‘ladi... Bizning hisob-kitoblarimizga ko‘ra, u ham eksport qilinadigan hamyonbop avtomobil bo‘ladi”, — degan Roodell’ning bosh direktori Doniyor Davletiyarov.
Jizzaxdagi erkin iqtisodiy zonaning a’zosi sifatida o‘z majburiyatlari doirasida Roodell ishlab chiqarilgan avtomobillarning taxminan 20 foizini eksport qilmoqchi, shuningdek, mahalliylashtirish darajasini kamida 30 foizga yetkazishga erishmoqchi.
Izoh (0)