Andijon viloyatining Jalaquduq tumani hududidan o‘tuvchi Xonobod—Andijon avtomobil yo‘lida sodir bo‘lgan YTH oqibatida Damas haydovchisi vafot etdi. Bu haqda “Daryo”ga viloyat IIB axborot xizmati xabar qildi.
Ma’lum bo‘lishicha, 2020-yil 30-sentabr kuni soat 18:00 da fuqaro A.A. Nexia-3 avtomobilida Jalaquduq tumani “To‘rachek” MFY hududidan o‘tgan Xonobod—Andijon yo‘lida harakatlanib kelayotib, fuqaro T.O. boshqaruvidagi Volvo FH12 yuk avtomashinasini quvib o‘tgan. Quvib o‘tish davomida Nexia haydovchisi yuk mashinasining o‘ng old tomoniga urilgan va boshqaruvni yo‘qotgan.
Natijada qarama-qarshi tomonga o‘tib ketib, ushbu yo‘nalishda kelayotgan fuqaro K.X. boshqaruvidagi Damas bilan to‘qnashuv sodir etgan. Buning oqibatida Damas haydovchisi K.X. hodisa joyida vafot etgan.
Mazkur holat yuzasidan Jalaquduq tuman IIB huzuridagi tergov bo‘linmasi tomonidan Jinoyat kodeksining 266-moddasi 2-qismi bilan jinoyat ishi qo‘zg‘atilib, tergov harakatlari olib borilmoqda.
Eslatib o‘tamiz, avvalroq Qashqadaryoda Nexia boshqaruvini yo‘qotib ag‘darilib ketishi oqibatida 3 kishi halok bo‘lgani, Surxondaryoda esa Nexia avtobus bilan to‘qnashishi oqibatida 21 yoshli haydovchi va mashinadagi yo‘lovchi vafot etgani xabar berilgandi.
Mavzuga doir:
Izoh (0)