“Yuventus” hujumchisi Krishtianu Ronaldu va amerikalik model Ketrin Mayorga o‘rtasidagi mojaro davom etadi.
Avvalroq Mayorga portugaliyalik futbolchi ustidan yana sudga shikoyat qilgani xabar qilingandi. U 2009-yilda Las-Vegasdagi mehmonxonada futbolchi tomonidan jinsiy zo‘ravonlikka uchragani bois 165 ming funt miqdorida kompensatsiya talab qilmoqda.
Model 2010-yilda Ronaldu vakillari bilan kelishuvga erishgan va 375 ming dollar evaziga ushbu ma’lumotlarni hech kimga oshkor qilmaslik bo‘yicha shartnoma imzolagan. Amerikalik sudya Jennifer Dorsi Mayorganing ko‘rsatmalarini tinglashini va jabrlanuvchi Ronalduning vakillari bilan kelishgan vaqtida o‘z qilmishiga javob bera oladigan holatda bo‘lgan yoki bo‘lmagani yuzasidan qaror qabul qilishini ma’lum qildi.
Sudyaning qayd etishicha, o‘sha vaqtda Mayorganing ruhiy holati qanday bo‘lgani, shuningdek, tomonlar o‘rtasida mazkur kelishuv haqiqatda bo‘lgan yoki bo‘lmaganiga oydinlik kiritish lozim.
Hozircha Mayorga va Ronalduga sudda ishtirok etish majburiyatini yuklash masalasi ochiq qolmoqda. Sudya tomonlarga tayyorgarlik ko‘rish uchun noyabr oxirigacha vaqt bergan.
Eslatib o‘tamiz, Mayorga 2018-yilda ham Ronalduni jinsiy zo‘ravonlikda ayblagan, biroq mazkur ish Ronalduning foydasiga hal bo‘lgan.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)