“Navbahor”ning strategiyasi o‘zgaradi, 2021-yildan jamoa a’zolari faqat mahalliy yoshlardan iborat bo‘ladi

Namanganning “Navbahor” jamoasida katta o‘zgarishlar ro‘y berishi kutilmoqda.

7-oktabr kuni Namangan viloyati hokimi vazifasini bajaruvchi, viloyat futbol assotsiatsiyasi prezidenti Shavkat Abdurazzoqov klub qarorgohida yig‘ilish o‘tkazdi. Unda viloyat rahbari “Navbahor” futbol klubining strategiyasi o‘zgarishi va jamoa bundan keyin mahalliy futbolchilar yordamida shakllantirilishini ma’lum qildi.

Garchi tarkib bo‘yicha Superliganing uncha-buncha jamoasidan qolishmasa-da, ancha mahoratli hamda tajribali futbolchilarga ega bo‘lsa-da, “Navbahor” so‘nggi 9 o‘yindan buyon g‘alaba qozona olmayapti. Bunga jamoa murabbiylari futbolchilarning ko‘pchiligi koronavirusga chalingani va hokazo bahonalar keltirdi.

Joriy  mavsum boshida jamoaning oldiga Osiyo Chempionlar Ligasi yo‘llanmasini qo‘lga kiritish vazifasi qo‘yilgandi. Biroq jamoa ko‘p ochko yo‘qotdi.

So‘nggi 3 yil davomida, ya’ni 2017-yildan 2020-yilning martiga qadar “Navbahor” prezidenti sifatida faoliyat olib bordim. O‘sha paytdan, ya’ni 2017-yildan boshlab jamoada yosh futbolchilarga e’tiborni kuchaytirganimizda, hozirgacha 3 yil davomida  ancha iqtidorli futbolchilar yetishib chiqqan bo‘lardi.

Biroq biz “Navbahor”ni yuksaltirish, jamoaning sovrindorlar safidan joy olishi, OChL yo‘llanmasini qo‘lga kiritishi uchun harakat qildik. Lekin bu kutilgan samarani bermadi. Endi “Navbahor”ning strategiyasi o‘zgaradi va asosiy e’tibor mahoratli yoshlarga qaratiladi.

2021-yildan jamoa sharafini faqat mahalliy yoshlar himoya qiladi. Biz barcha namanganlik iqtidorli, yosh futbolchilarni qo‘llab-quvvatlaymiz, investitsiyani mahalliy yosh, iqtidorli futbolchilarni yetishtirib chiqarish uchun yo‘naltiramiz.

Namangandagi barcha futbol maktablari va akademiyalari endi “Navbahor” tasarrufiga o‘tadi hamda ushbu ta’lim maskanlaridagi barcha futbolchilar eng avvalo “Navbahor” bilan shartnoma imzolaydi.

Shavkat Abdurazzoqov, Namangan viloyati hokimi vazifasini bajaruvchi