“Guljahon Yo‘ldosheva ishiga fuqaroning o‘limi sabab bo‘lgan bo‘lsa, boshqa hududlardan tushayotgan bu boradagi murojaatlarni ham o‘rganish kerak” – Akmal Burhonov

Korrupsiyaga qarshi kurashish agentligi direktori Akmal Burhonov qamoqda saqlanayotgan Toshkent viloyati bosh infeksionist shifokori Guljahon Yo‘ldosheva ishi bo‘yicha o‘z munosabatini bildirdi. Bu haqda “Kun.uz” xabar qilmoqda.

Yo‘ldosheva unga nisbatan qo‘zg‘atilgan jinoyat ishi doirasida ehtiyot chorasi sifatida qamoqqa olingandi. Qamoq ehtiyot chorasi tanlanishiga uning tergovdan yashiringani va rasmiy hujjatlarni nobud qilishga uringani sabab qilib ko‘rsatilgan.

Akmal Burhonovning aytishicha, juda ko‘plab bemorlar shifoxonalarda vafot etmoqda, bu borada ko‘plab murojaatlar tushmoqda.

“Agar haqiqatan bu jinoiy ish fuqaroning o‘limiga sabab bo‘lganligi yuzasidan qo‘zg‘atilgan bo‘lsa, boshqa hudud va shifoxonalarda ham murojaatlar asosida kelib tushgan o‘lim holatlari o‘rganilishi kerak. Unda ham jinoyat-protsessual harakat olib borish maqsadga muvofiq bo‘ladi”, — deydi Burhonov.

Eslatib o‘tamiz, Toshkent viloyati yuqumli kasalliklar shifoxonasi bosh shifokori Guljahon Yo‘ldosheva qariyb bir oydan buyon hibsda edi. Holatga sabab bo‘lgan narsa esa shifokor G.Yo‘ldoshevaning “Kun.uz” saytiga bergan intervyusi, shifoxonasi duchor bo‘lgan muammolarni gapirib bergani bo‘ldi.

Yo‘ldosheva unga nisbatan qo‘zg‘atilgan jinoyat ishi doirasida ehtiyot chorasi sifatida qamoqqa olingandi. Qamoq ehtiyot chorasi tanlanishiga uning tergovdan yashiringani va rasmiy hujjatlarni nobud qilishga uringani sabab qilib ko‘rsatilgan.

Guljahon Yo‘ldosheva ishi bo‘yicha Oliy Majlis Senati raisi Tanzila Norboyeva o‘z munosabatini bildirib, ayol sud qarori chiqmaguncha uyda saqlanishi mumkin ekanligini ta’kidlagan.

Keyinroq Saida Mirziyoyeva Toshkent viloyatining prokuraturasidan Guljahon Yo‘ldoshevani qamoqqa olish haqidagi qarorni qayta ko‘rib chiqishni so‘radi. Ushbu murojaatdan so‘ng Guljahon Yo‘ldosheva uy qamog‘iga o‘tkazildi.