“Biz hokimlarni saylash tizimiga o‘tishimiz kerak” — Sherzod Kudbiyev

O‘zbekiston hokimlarni xalq tomonidan saylash tizimiga o‘tishi kerak, ammo bunga tayyorgarlik ko‘rish lozim. “Gazeta.uz”ning ma’lum qilishicha, bu haqda Davlat soliq qo‘mitasi raisi Sherzod Kudbiyev “Alter Ego” loyihasiga bergan intervyusida aytib o‘tdi.

Prezident Shavkat Mirziyoyev hokimlar lavozimini saylanadigan qilish taklifi bilan birinchi marta 2016-yil dekabrida chiqqandi. 2017-yil avgustida u hokimlarni xalq tomonidan saylash tizimini “hoziroq” joriy etishga tayyorligini bildirgan.

2020-yilning sentabr oyida davlat rahbari O‘zbekiston hokimlarni saylash tizimiga o‘tishini yana bir bor ta’kidlagan. Shu bilan birga, rivojlanish darajasi “qoniqarsiz” hamda “o‘rta” deb baholangan tuman va shaharlarda inqirozga qarshi boshqaruv tizimi joriy etilishi ma’lum qilingan. Ya’ni, ularga rahbarlik qilish istagini bildirgan har qanday talabgor hududni rivojlantirish dasturini mahalliy kengashlarda himoya qilishi mumkin. Xalq vakillarini ishontira olgan salohiyatli kishilar butun jamoasi bilan tumanga rahbar etib tayinlanadi.

Demokratiya haqida gapirar ekan, u DSQga ishga olingan qiz bilan bo‘lgan suhbatni misol tariqasida keltirdi. Sherzod Kudbiyev suhbatni davlat tilida olib borgan, nomzod esa savollarga rus tilida javob bergan. O‘zbek tilida javob berishni so‘rashganda, u o‘zi ma’qul deb topgan tilda gaplashish huquqiga ega ekanligini aytgan.

“Ha, lekin sizning huquqingiz mening huquqim boshlangan joyda tugaydi. Demokratiya masalasida bu haqda unutmasligimiz kerak. Demokratiya eng avvalo ulkan mas’uliyat ekanligini unutmasligimiz kerak. Bizda demokratiyani xohlagan narsamni qila olishim deb tushunishadi. Yo‘q, siz xohlagan narsangizni qilishingiz mumkin, agar bu mening manfaatlarimga zarar yetkazmasa. Mana shu demokratiya. Tizimda adolat mezoni bo‘lishi kerak”, — deya tushuntigan u.

Davlat soliq qo‘mitasi rahbari hokimlarni xalq tomonidan saylash mexanizmini to‘g‘ri deb hisoblaydi.

Qo‘mita raisi, shuningdek, qo‘l ostidagi xodimlar bilan qo‘pol muomala qiladigan rahbarlar haqida ham to‘xtalib o‘tdi. “Bunga (qo‘pollik — tahr.) mutlaqo ehtiyoj yo‘q. Bunga qat’iyan yo‘l qo‘yib bo‘lmaydi. Hech kim hech qachon biror bir hokimga, umuman, mansabdor shaxsga — vazirga ham, raisga ham, bo‘lim boshlig‘iga ham, o‘z qo‘li ostidagi xodimlarini qadr-qimmatini oyoqosti qilish huquqini bermagan. Men bir paytlar mehnat vaziri edim, shuning uchun majburiy mehnat, bunday muomala masalalari... hech qachon hech kimga bunday huquq berilmagan. Va O‘zbekiston kelajagi bu bilan bog‘liq emas”, — deb ta’kidlagan u.

Sherzod Kudbiyev qo‘pollik qiladigan rahbarlarni zaif deb hisoblaydi. “Bu noto‘g‘ri yondashuv. Bu o‘zlarining kasbiy, tashkilotchilik qobiliyatlari bilan odamni ishlashga unday olmasliklari,  ma’muriy yo‘l bilangina bajarishga majbur qilishlarini ko‘rsatadi. Bu noto‘gri. Bu odamning zaifligidan dalolat beradi”, — degan DSQ rahbari.

Sherzod Kudbiyev avvalroq Toshkent shahrining Mirzo-Ulug‘bek tumani hokimi (2016—2018), Bandlik va mehnat munosabatlari vaziri (2018—2019), Prezidentning davlat xizmati va vakolatli hokimiyat bilan o‘zaro aloqalar bo‘yicha maslahatchisi (2019—2020) lavozimlarida faoliyat yuritgan, shu yilning may oyidan buyon esa Davlat soliq qo‘mitasi raisi lavozimida ishlab kelmoqda.