Тошкент вилояти прокуратураси томонидан Паркент тумани ҳокимлиги томонидан Captiva русумли автомашинани сотиб олишда қонун бузилиши ҳолатлари аниқланди. Бу ҳақда Коррупцияга қарши кураш агентлиги раҳбари Акмал Бурҳонов агентликда ташкил этилган матбуот анжуманида маълум қилди.
Қайд этилишича, 14 сентябрь куни давлат харидлари веб-сайтида Паркент тумани ҳокимлиги захира фонди маблағларидан фойдаланган ҳолда 2018 йилги Captiva-2 автомобилини 260 миллион сўмга сотиб олганлиги тўғрисида маълумот пайдо бўлди. Автомобиль Mega Karer МЖЧдан сотиб олингани маълум қилинди.
МЧЖ таъсисчилари қаторида туман ҳокими Ниғмат Исроилович Муҳамедовнинг ўғли Сардор Ниғматович Исроилов (34%) ҳам қайд этилган.
Тошкент вилояти ҳокимлиги матбуот котиби Беҳзод Қобулов автомобиль харидини изоҳлар экан, Паркент тумани тоғлар ва тоғ этакларидан иборат бўлганлиги сабабли 2019 йилда туман маъмурияти Captiva русумли автомашина сотиб олишни режалаштиргани, бироқ ўша вақтда туман бюджетида етарли маблағ бўлмагани туфайли, туман ҳокимининг фарзанди, яъни Mega Karer МЧЖ таъсисчиларидан бири отаси фойдаланиши учун мазкур машинани бериб турганини маълум қилган.
Коррупцияга қарши курашиш агентлиги вазиятни ўрганиб чиқиб, терговга қадар текшириш учун Бош прокуратурага сўров юборганди. Ушбу факт бўйича прокуратура Паркент тумани ҳокимининг ҳаракатларини терговга қадар текширувдан ўтказди.
Текширув давомида «Давлат харидлари тўғрисида»ги қонун бузилиши, хусусан, автомобиль сотиб олишда манфаатлар тўқнашуви аниқланди. Натижада, туман ҳокимининг автомобиль сотиб олиш тўғрисидаги буйруғи бекор қилинди ва Mega Karer МЧЖ 260 миллион сўмни ҳокимият ҳисоб рақамига қайтариб берди.
Тошкент вилояти прокуратураси терговга қадар текширишни давом эттирмоқда.
Изоҳ (0)