Jizzax viloyatida 2020-yilning 1-oktabr kuni taxminan soat 19:40 larda Zarbdor tumani Bo‘ston shaharchasi hududidan o‘tgan A-376 avtomobil yo‘lining 285-kilometrida yo‘l-transport hodisasi sodir etilgan, deya xabar bermoqda YHXBB.
Ma’lum qilinishicha, Zarbdor–Jizzax yo‘nalishi bo‘yicha harakatlanib ketayotgan noma’lum transport vositasi Sharof Rashidov tumanida yashovchi 1973-yilda tug‘ilgan piyodani urib yuborgan. Natijada piyoda olgan tan jarohatlari bilan voqea joyida vafot etgan. Haydovchi esa voqea joyini tark etgan.
Voqeaga guvoh bo‘lgan fuqaro hodisani quyidagicha izohladi.
“Men 1-oktabr kuni soat 19:30 larda Dashtobod shahridan qaytib kelayotgandim. Shu payt Bo‘stonda Isuzu yo‘lovchi tashish avtobusi oldimga tushdi. Bir-ikki marta quvib o‘tmoqchi edim, lekin qarama–qarshi yo‘nalishda avtomashinalar kelayotgani sabab unday qilmadim. Shunda Isuzu tagidan bir ko‘rpaga o‘xshash narsa changib chiqib keldi.
Men tezda to‘xtadim, keyin avtobusni to‘xtatib, haydovchiga odam urib yuborganini aytsam, u men aylanib o‘tdim, dedi. Biz yo‘ldagi odamni chetga olib tez yordam chaqirdik”, – deydi guvoh.
Jizzax viloyati IIB YHXB xodimlari tomonidan olib borilgan tezkor qidiruv-surishtiruv natijasida YTH sodir etgan avtomobil va uning haydovchisi aniqlandi.
Jizzax viloyati IIB YHXB katta inspektori Otabek Kamolovning qayd etishicha, mazkur YTH yuzasidan zudlik bilan viloyat miqyosida to‘sib ushlash e’lon qilinib, olib borilgan qidiruv surishtiruv hamda guvohlarning ko‘rsatmasi va olingan dalillarga asoslanib ushbu jinoyat Jizzax viloyati Zarbdor tumanida doimiy yashovchi 1965-yilda tug‘ilgan Isuzu rusumli transport vositasining haydovchisi tomonidan sodir etilgani aniqlandi.
Mazkur holat yuzasidan Zarbdor tumani IIB Tergov bo‘linmasi tomonidan Jinoyat kodeksining 266-moddasi 2-qismi (odamlar o‘limiga olib kelgan transport vositalari harakati yoki ulardan foydalanish xavfsizligi qoidalarini buzish) va 117-moddasi 2-qismi (odam o‘lishiga sabab bo‘lgan xavf ostida qoldirish) bilan jinoyat ishi qo‘zg‘atilib, tergov harakatlari olib borilmoqda.
Mavzuga doir:
Izoh (0)