Жиззах вилоятида 2020 йилнинг 1 октябрь куни тахминан соат 19:40 ларда Зарбдор тумани Бўстон шаҳарчаси ҳудудидан ўтган А-376 автомобиль йўлининг 285-километрида йўл-транспорт ҳодисаси содир этилган, дея хабар бермоқда ЙҲХББ.
Маълум қилинишича, Зарбдор–Жиззах йўналиши бўйича ҳаракатланиб кетаётган номаълум транспорт воситаси Шароф Рашидов туманида яшовчи 1973 йилда туғилган пиёдани уриб юборган. Натижада пиёда олган тан жароҳатлари билан воқеа жойида вафот этган. Ҳайдовчи эса воқеа жойини тарк этган.
Воқеага гувоҳ бўлган фуқаро ҳодисани қуйидагича изоҳлади.
«Мен 1 октябрь куни соат 19:30 ларда Даштобод шаҳридан қайтиб келаётгандим. Шу пайт Бўстонда Isuzu йўловчи ташиш автобуси олдимга тушди. Бир-икки марта қувиб ўтмоқчи эдим, лекин қарама–қарши йўналишда автомашиналар келаётгани сабаб ундай қилмадим. Шунда Isuzu тагидан бир кўрпага ўхшаш нарса чангиб чиқиб келди.
Мен тезда тўхтадим, кейин автобусни тўхтатиб, ҳайдовчига одам уриб юборганини айтсам, у мен айланиб ўтдим, деди. Биз йўлдаги одамни четга олиб тез ёрдам чақирдик», – дейди гувоҳ.
Жиззах вилояти ИИБ ЙҲХБ ходимлари томонидан олиб борилган тезкор қидирув-суриштирув натижасида ЙТҲ содир этган автомобиль ва унинг ҳайдовчиси аниқланди.
Жиззах вилояти ИИБ ЙҲХБ катта инспектори Отабек Камоловнинг қайд этишича, мазкур ЙТҲ юзасидан зудлик билан вилоят миқёсида тўсиб ушлаш эълон қилиниб, олиб борилган қидирув суриштирув ҳамда гувоҳларнинг кўрсатмаси ва олинган далилларга асосланиб ушбу жиноят Жиззах вилояти Зарбдор туманида доимий яшовчи 1965 йилда туғилган Isuzu русумли транспорт воситасининг ҳайдовчиси томонидан содир этилгани аниқланди.
Мазкур ҳолат юзасидан Зарбдор тумани ИИБ Тергов бўлинмаси томонидан Жиноят кодексининг 266-моддаси 2-қисми (одамлар ўлимига олиб келган транспорт воситалари ҳаракати ёки улардан фойдаланиш хавфсизлиги қоидаларини бузиш) ва 117-моддаси 2-қисми (одам ўлишига сабаб бўлган хавф остида қолдириш) билан жиноят иши қўзғатилиб, тергов ҳаракатлари олиб борилмоқда.
Изоҳ (0)