Twitter ijtimoiy tarmog‘i COVID-19’ga chalingan AQSh prezidenti Donald Trampning ushbu kasallikdan o‘lishini tilab tvit yozgan foydalanuvchilarning xabarlarini o‘chirishni boshlaydi. Bu haqda kompaniya rasmiylari ma’lum qilgan, deb yozmoqda Motherboard.
Nashrning qayd etishicha, platformaning ayrim foydalanuvchilari Trampning koronavirusga chalingani haqidagi xabarlardan keyin ochiqchasiga yoki yashirin ravishda unga o‘lim tilashni boshladi.
“Foydalanuvchilar kimgadir turli jarohatlar olish yoki og‘ir xastalikka chalinishni tilab yozgan tvitlar taqiqlangan va darhol o‘chiriladi”, — deyilgan kompaniya bayonotida.
Shuningdek, Twitter rasmiylari mazkur holatlarga nisbatan foydalanuvchi kelishuvining “haqoratli harakat to‘g‘risidagi” bandi bilan chora ko‘rilishini qayd etgan. Kelishuvga ko‘ra, ochiq yoki berkitilgan akkauntlardan yozilgan izohlar o‘chirib tashlanadi va foydalanuvchi muayyan vaqt davomida “faqat o‘qish” rejimiga o‘tkazilishi mumkin.
Kompaniya vakillarining qo‘shimcha qilishicha, bunda haqiqatdan ham ziyon keltirishi mumkin bo‘lgan kontentning o‘chirilishi va bloklanishi birlamchi ahamiyatga ega. Twitter rasmiylari Trampning koronavirusdan o‘lib ketishiga umid qilishi haqida yozgan foydalanuvchilarning tvitlari borasida qanday choralar ko‘rilishiga aniqlik kiritmagan.
Motherboard’ning yozishicha, Facebook ijtimoiy tarmog‘i bu borada biroz boshqacha siyosat olib boradi. Mark Sukerberg kompaniyasi odatiy foydalanuvchi va ommaviy shaxslarni ajratib, chora ko‘radi (Twitter’da unday emas, barcha teng huquqli). Facebook bayonotida ommaga ta’sir o‘tkaza oladigan shaxslarning tanqidiy fikr bildirishiga ruxsat berilishi yozilgan.
“Taniqli shaxslar belgilangan va bu orqali ularga uyushtirilgan hujumlar o‘chiriladi, bu jiddiy va haqoratli holatni keltirib chiqarishi mumkin”, – deyiladi ijtimoiy tarmoq bayonotida.
Facebook Trampning koronavirusdan o‘lishiga umid qilish mumkinligi, ammo bunda to‘g‘ridan to‘g‘ri tahdidlar hamda prezidentning o‘zi belgilanmasligi talab etilishiga ruxsat berilishiga shama qilgan.
Donald Tramp hamda uning rafiqasi Melaniya COVID-19 bilan kasallangani haqida 2-oktabrda ma’lum qilingan. Bunga qadar u maslahatchisi koronavirusga chalinganidan keyin Oq uyda o‘zni yakkalash tartibiga o‘tgan. Trampning saylovoldi tashviqot tadbirlari onlayn-formatga o‘tkazilgan yoki boshqa muddatga qoldirilgan. Uning saylovlardagi raqibi, demokrat Jo Bayden davlat rahbari kasallikka chalingan vaqtda uni iloji boricha tanqid qilmaslikka urinmoqda.
Prezidentning davolovchi shifokori Shon Konli Trampga remdisivir preparati tavsiya qilingani va antitanalar kokteylidan inyeksiya yuborilganini ma’lum qildi. Konlining so‘zlariga ko‘ra, prezident o‘zini yaxshi his etmoqda, uning isitmasi yo‘q va u istagan kuni shifoxonadan chiqarilishi mumkin.
Izoh (0)