Twitter ижтимоий тармоғи COVID-19’га чалинган АҚШ президенти Дональд Трампнинг ушбу касалликдан ўлишини тилаб твит ёзган фойдаланувчиларнинг хабарларини ўчиришни бошлайди. Бу ҳақда компания расмийлари маълум қилган, деб ёзмоқда Motherboard.
Нашрнинг қайд этишича, платформанинг айрим фойдаланувчилари Трампнинг коронавирусга чалингани ҳақидаги хабарлардан кейин очиқчасига ёки яширин равишда унга ўлим тилашни бошлади.
«Фойдаланувчилар кимгадир турли жароҳатлар олиш ёки оғир хасталикка чалинишни тилаб ёзган твитлар тақиқланган ва дарҳол ўчирилади», — дейилган компания баёнотида.
Шунингдек, Twitter расмийлари мазкур ҳолатларга нисбатан фойдаланувчи келишувининг «ҳақоратли ҳаракат тўғрисидаги» банди билан чора кўрилишини қайд этган. Келишувга кўра, очиқ ёки беркитилган аккаунтлардан ёзилган изоҳлар ўчириб ташланади ва фойдаланувчи муайян вақт давомида «фақат ўқиш» режимига ўтказилиши мумкин.
Компания вакилларининг қўшимча қилишича, бунда ҳақиқатдан ҳам зиён келтириши мумкин бўлган контентнинг ўчирилиши ва блокланиши бирламчи аҳамиятга эга. Twitter расмийлари Трампнинг коронавирусдан ўлиб кетишига умид қилиши ҳақида ёзган фойдаланувчиларнинг твитлари борасида қандай чоралар кўрилишига аниқлик киритмаган.
Motherboard’нинг ёзишича, Facebook ижтимоий тармоғи бу борада бироз бошқача сиёсат олиб боради. Марк Цукерберг компанияси одатий фойдаланувчи ва оммавий шахсларни ажратиб, чора кўради (Twitter’да ундай эмас, барча тенг ҳуқуқли). Facebook баёнотида оммага таъсир ўтказа оладиган шахсларнинг танқидий фикр билдиришига рухсат берилиши ёзилган.
«Таниқли шахслар белгиланган ва бу орқали уларга уюштирилган ҳужумлар ўчирилади, бу жиддий ва ҳақоратли ҳолатни келтириб чиқариши мумкин», – дейилади ижтимоий тармоқ баёнотида.
Facebook Трампнинг коронавирусдан ўлишига умид қилиш мумкинлиги, аммо бунда тўғридан-тўғри таҳдидлар ҳамда президентнинг ўзи белгиланмаслиги талаб этилишига рухсат берилишига шама қилган.
Дональд Трамп ҳамда унинг рафиқаси Мелания COVID-19 билан касаллангани ҳақида 2 октябрда маълум қилинган. Бунга қадар у маслаҳатчиси коронавирусга чалинганидан кейин Оқ уйда ўзни яккалаш тартибига ўтган. Трампнинг сайловолди ташвиқот тадбирлари онлайн-форматга ўтказилган ёки бошқа муддатга қолдирилган. Унинг сайловлардаги рақиби, демократ Жо Байден давлат раҳбари касалликка чалинган вақтда уни иложи борича танқид қилмасликка уринмоқда.
Президентнинг даволовчи шифокори Шон Конли Трампга ремдисивир препарати тавсия қилингани ва антитаналар коктейлидан инъекция юборилганини маълум қилди. Конлининг сўзларига кўра, президент ўзини яхши ҳис этмоқда, унинг иситмаси йўқ ва у истаган куни шифохонадан чиқарилиши мумкин.
Изоҳ (0)