Qo‘ziqorin va tovuqdan fransuzcha taom tayyorlab ko‘ring

Pomidor va pishloq yordamida yumshoq pishirilgan tovuqli taom — kechki ovqat hamda bayramona dasturxon uchun ajoyib tanlov!

Kerakli mahsulotlar:

• Tovuq filesi – 800-900 gr;
• Piyoz – 1-2 dona;
• Pomidor – 2-3 dona;
• Qo‘ziqorin – 400 gr;
• Smetana – 200 gr;
• Pishloq – 200-250 gr;
• O‘simlik yog‘i – 3-4 osh qoshiq;
• Tuz va ziravorlar.

1. Tovuq filesiga tuz va ziravorlar sepilib, maxsus plyonkaga o‘raladi. Oshxona bolg‘asi bilan yaxshilab uriladi.
2. Piyoz va pomidor esa parrak qilib to‘g‘raladi.
3. Qo‘ziqorin mayda to‘g‘ralib, 7-10 daqiqa mobaynida 2-3 osh qoshiq yog‘ solingan tovada qovuriladi. Biroz sovigandan so‘ng smetana bilan aralashtiriladi.
4. Tovuq filesi yog‘langan qolip ichiga joylashtiriladi, ustidan qo‘ziqorin, piyoz va pomidor solinadi. So‘ngra qirg‘ichdan o‘tkazilgan pishloq sepiladi.
5. 200 darajada qizigan pechga 30-35 daqiqaga qo‘yiladi.