Madridning “Real” klubi koronavirus pandemiyasi sabab jiddiy zarar ko‘rish mumkin.
AS’ning yozishicha, agar mavsum oxirigacha stadionga tomoshabinlarning kiritilishiga ruxsat berilmasa madridliklar klubi 195 million yevro yo‘qotadi. “Real” inqirozga qarshi rejalar ustida ishlamoqda.
“Real”ning asosiy daromad manbayi uchta — telehuquqlar, homiylik to‘lovlari va o‘yin kunidagi daromad. Klubning yillik budjeti 882 million yevroni tashkil qiladi, ulardan 625 millioni telehuquqlar va homiylik to‘lovlariga to‘g‘ri keladi.
Mazkur sharoitda “Real” futbolchilari klubga o‘z yordamini ko‘rsatmoqda. Futbolchilar maoshni kamayishiga rozi bo‘lgach, klub 50 million yevroni tejab qolgan. Shuningdek, o‘yinchilarning o‘tgan mavsumdagi yutuqlar uchun beriladigan mukofot pulidan voz kechishi 25 million yevroning tejalishiga xizmat qilgan.
Bundan tashqari “Real” 2020-yilgi transfer oynasida futbolchilar sotuvidan 100 million yevro atrofida mablag‘ ishlab oldi.
Ta’kidlanishicha, ko‘plab top-klublar mana shunday muammoga duch kelgan. Kichikroq klublardagi vaziyat boshqacharoq, sababi telehuquqlardan tushadigan mablag‘ ularning maoshga sarflaydigan xarajatini qoplaydi.
Mavzuga doir:
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)