«Реал» коронавирус сабаб қанча маблағ йўқотиши мумкинлиги маълум бўлди

Мадриднинг «Реал» клуби коронавирус пандемияси сабаб жиддий зарар кўриш мумкин.

АS’нинг ёзишича, агар мавсум охиригача стадионга томошабинларнинг киритилишига рухсат берилмаса мадридликлар клуби 195 миллион евро йўқотади. «Реал» инқирозга қарши режалар устида ишламоқда.

«Реал»нинг асосий даромад манбайи учта — телеҳуқуқлар, ҳомийлик тўловлари ва ўйин кунидаги даромад. Клубнинг йиллик бюджети 882 миллион еврони ташкил қилади, улардан 625 миллиони телеҳуқуқлар ва ҳомийлик тўловларига тўғри келади.

Мазкур шароитда «Реал» футболчилари клубга ўз ёрдамини кўрсатмоқда. Футболчилар маошни камайишига рози бўлгач, клуб 50 миллион еврони тежаб қолган. Шунингдек, ўйинчиларнинг ўтган мавсумдаги ютуқлар учун бериладиган мукофот пулидан воз кечиши 25 миллион евронинг тежалишига хизмат қилган.

Бундан ташқари «Реал» 2020 йилги трансфер ойнасида футболчилар сотувидан 100 миллион евро атрофида маблағ ишлаб олди.

Таъкидланишича, кўплаб топ-клублар мана шундай муаммога дуч келган. Кичикроқ клублардаги вазият бошқачароқ, сабаби телеҳуқуқлардан тушадиган маблағ уларнинг маошга сарфлайдиган харажатини қоплайди.