Ijtimoiy tarmoqlarda o‘zbek qizlarini Janubiy Koreya fuqarolariga turmushga berish uchun tayyorlayotgan markaz faoliyatiga oid video tarqaldi. Videoda koreys millatiga mansub erkak yig‘ilgan qizlarga koreyalik turmush o‘rtoqlari bilan til topishish va yaxshi yashab ketish uchun kerakli tavsiyalarni berayotgani aks etgan. Tashqi mehnat migratsiyasi agentligi mazkur videoda aks etgan holatga izoh berdi.
Ma’lum bo‘lishicha, mazkur video Toshkent shahar Yakkasaroy tumani “H.Sulaymonov” mahalla fuqarolar yig‘ini hududidagi 2-Mirobod ko‘chasi 35-uyda joylashgan “Sejong Hakdang” o‘quv markazida 2020-yil 7-sentabr kuni navbatdagi o‘quv mavsumining ochilish marosimida tasvirga olingan.
“Sejong Hakdang” o‘quv markazi 1992-yilda tashkil etilgan bo‘lib, O‘zbekiston fuqarolariga koreys tili, madaniyati va milliy taomlarini o‘rgatish maqsadida faoliyat olib boradi.
Agentlikning o‘quv markaz rahbari Xo So Xengga tayanib ma’lum qilishicha, hozirgi vaqtda markazda tahsil olayotgan 350 nafar o‘quvchining 31 nafari Janubiy Koreya fuqarolariga turmushga chiqqan.
“O‘quv markazi o‘z o‘quvchilariga faqat koreys tili va madaniyati, shuningdek, qiziquvchilar uchun koreys milliy taomlarini o‘rgatish bilan shug‘ullanadi. Ularni chet elga yuborish yoki Janubiy Koreya davlati fuqarolariga turmushga chiqishini tashkil etish bu o‘quv maskani maqsadlariga kirmaydi. Bu yerda tahsil olayotgan, koreys fuqarolariga turmushga chiqqan o‘zbek qizlarining ular bilan tanishuvi yoki oila qurishiga mazkur o‘quv markazining aloqasi yo‘q. Bu fuqarolar turmushga chiqib, o‘rnatilgan tartibda nikohni qayd etgandan so‘ng bu o‘quv markaziga murojaat qilgan”, — deyiladi Tashqi mehnat migratsiyasi agentligi xabarida.
Avvalroq o‘zbekistonliklar Janubiy Koreyaga COVID-19’ga chalinmaganlik haqida soxta ma’lumotnoma bilan kelayotgani ma’lum qilingandi.
Izoh (0)