Professor Nazira Salohova 77 yoshida vafot etdi
Tibbiyot fanlari doktori, professor Nazira Salohova 77 yoshida vafot etdi, deb xabar bermoqda Innovatsion rivojlanish vazirligi matbuot xizmati.
Qayd etilishicha, endokrinolog, professor, Jahon sog‘liqni saqlash tashkilotining O‘zbekistondan endokrinologiya bo‘yicha birinchi koordinatori, Xalqaro diabetologlar federatsiyasining (IDF) doimiy a’zosi, Markaziy Osiyo diabetologlar assotsiatsiyasining birinchi prezidenti Nazira Salohova uzoq davom etgan kasallikdan so‘ng vafot etdi.
Nazira Salohova 1943-yilda Samarqand shahrida davlat xizmatchilari oilasida tug‘ilgan. I.M.Sechenov nomidagi Moskva davlat tibbiyot universitetini imtiyozli diplom bilan tugatgan. Kasbiy faoliyatini Toshkentdagi Fanlar Akademiyasining Bioorganik kimyo institutida katta ilmiy xodim sifatida boshlagan.
Keyinchalik Toshkent tibbiyot institutining endokrinologiya kafedrasi mudiri lavozimida ishlagan. Tibbiyot fanlari doktori, professor Nazira Salohova tibbiyot fanlari nomzodi va doktori bo‘lgan ko‘plab ilmiy kadrlar tayyorlagan.
Bundan avval o‘zbekistonlik genetik olim Miradham Abzalov, Xonobod shahri hokimi Musaxon Mamadaliyev, Akademik To‘ra Mirzayev, Bosh prokuraturaning Uyushgan jinoyatchilik va korrupsiyaga qarshi kurashish boshqarmasi boshlig‘i Saydulla Elmurodov, Yashnobod tuman sudining yosh xodimi Shahboz Turg‘unboyev vafot etgani haqida xabar berilgandi.
