Rossiya Konstitutsiyaviy sudi o‘z farmonlari bilan COVID-19 epidemiyasi paytida aholining harakatlanishini cheklagan gubernatorlar harakatlariga qarshi shikoyatni ko‘rib chiqadi. Bu haqda “Kommersant” xabar bermoqda.
Nashrning qayd etishicha, bu Konstitutsiyaviy sudga yetib borgan birinchi shunday shikoyat bo‘lib, Moskva yaqinidagi Protvino shahar sudi tomonidan topshirilgan. U Moskva viloyati gubernatori Andrey Vorobyovning “yuqori tayyorgarlik rejimi” to‘g‘risidagi qarori konstitutsiyaga qanchalik muvofiqligini tekshirishni so‘ragan.
Konstitutsiyaviy sudga murojaat qilishga 2020-yilning aprel oyida ushbu qaror talablarini buzgan holda uydan zaruratsiz chiqqan mahalliy fuqaro Sergey Pantyuxovning murojaati sabab bo‘lgan.
Pantyuxov huquqbuzarlik sodir etganligini tan olgan. Sud fuqaroning ishida jinoyat tarkibi yo‘qligi sababli ishni yopgan va Rossiya konstitutsiyasining erkin harakatlanish huquqi kafolatlangan 27-moddasiga tayanib, uni jarimaga tortmagan.
Xabarda aytilishicha, sud gubernatorlar ushbu huquqni cheklash vakolatiga ega emas deb topgan.
Protvino Konstitutsiyaviy sudga qilgan murojaatida, shuningdek, Vladimir Putinning “shaxslar va transport vositalarining harakatlanishi uchun maxsus tartib o'rnatish to‘g‘risida” gubernatorlarga ko‘rsatma bergan 2020-yil 2-apreldagi farmoniga tayangan. Lekin farmon fuqarolar huquq va erkinliklarini cheklashga yo‘l qo‘ymagan.
“Kommersant”ning qayd etishicha, Rossiya sudlarining turli instansiyalarida epidemiya tufayli hududlar rahbarlari tomonidan chiqarilgan qarorlar ustidan fuqarolar bir necha marta da’vo kiritib qarshi chiqishga uringan. Lekin bunday da’volar ko‘rib chiqilmasdan qolib ketgan yoki da’vogarlarga qaytarilgan.
Izoh (0)