Россия Конституциявий суди ўз фармонлари билан COVID-19 эпидемияси пайтида аҳолининг ҳаракатланишини чеклаган губернаторлар ҳаракатларига қарши шикоятни кўриб чиқади. Бу ҳақда «Коммерсантъ» хабар бермоқда.
Нашрнинг қайд этишича, бу Конституциявий судга етиб борган биринчи шундай шикоят бўлиб, Москва яқинидаги Протвино шаҳар суди томонидан топширилган. У Москва вилояти губернатори Андрей Воробьёвнинг «юқори тайёргарлик режими» тўғрисидаги қарори конституцияга қанчалик мувофиқлигини текширишни сўраган.
Конституциявий судга мурожаат қилишга 2020 йилнинг апрель ойида ушбу қарор талабларини бузган ҳолда уйдан заруратсиз чиққан маҳаллий фуқаро Сергей Пантюховнинг мурожаати сабаб бўлган.
Пантюхов ҳуқуқбузарлик содир этганлигини тан олган. Суд фуқаронинг ишида жиноят таркиби йўқлиги сабабли ишни ёпган ва Россия конституциясининг эркин ҳаракатланиш ҳуқуқи кафолатланган 27-моддасига таяниб, уни жаримага тортмаган.
Хабарда айтилишича, суд губернаторлар ушбу ҳуқуқни чеклаш ваколатига эга эмас деб топган.
Протвино Конституциявий судга қилган мурожаатида, шунингдек, Владимир Путиннинг «шахслар ва транспорт воситаларининг ҳаракатланиши учун махсус тартиб ўрнатиш тўғрисида» губернаторларга кўрсатма берган 2020 йил 2 апрелдаги фармонига таянган. Лекин фармон фуқаролар ҳуқуқ ва эркинликларини чеклашга йўл қўймаган.
«Коммерсантъ»нинг қайд этишича, Россия судларининг турли инстанцияларида эпидемия туфайли ҳудудлар раҳбарлари томонидан чиқарилган қарорлар устидан фуқаролар бир неча марта даъво киритиб қарши чиқишга уринган. Лекин бундай даъволар кўриб чиқилмасдан қолиб кетган ёки даъвогарларга қайтарилган.
Изоҳ (0)