Namangan viloyatining Chust tumanidagi 52-ixtisoslashtirilgan umumta’lim maktabining barcha bitiruvchisi oliy o‘quv yurtlari talabasiga aylandi. Bu haqda “Daryo” muxbiri Azizbek Abduvaliyev xabar bermoqda.
Viloyat xalq ta’limi boshqarmasi axborot xizmatiga ko‘ra, 2019/2020-o‘quv yilida mazkur maktabni 18 nafar o‘quvchi tamomlagan. 16 nafari O‘zbekistondagi mahalliy oliy o‘quv yurtlari talabasi bo‘ldi. Bir o‘quvchi Sharda-O‘zbekiston universitetiga, yana biri esa Kiprning Rauf Denktosh universitetiga qabul qilindi.
“Buni nafaqat 29 nafar ustoz-muallimning yutug‘i, balki bitiruvchilarning ilm yo‘lidagi intilishlari hamda ota-onalarning e’tibori samarasi. Kelgusida ham barcha bitiruvchilarimiz shunday yuqori natijalariga erishishi borasida astoydil harakat qilamiz”, — deydi maktab direktori Fazliddin Qo‘chqorov.
Ma’lumot uchun, Namangan viloyatida 280 nafar o‘quvchi muddatidan oldin oliy ta’lim muassasalariga, 24 nafari esa xorijdagi nufuzli oliy o‘quv yurtlariga o‘qishga qabul qilingandi.
Izoh (0)