Xorazm viloyati Xiva shahrida har ikki yilda bir marta “Lazgi” xalqaro raqs festivali tashkil etiladi. Bu haqdagi qaror Prezident tomonidan imzolandi, deb xabar bermoqda O‘zA.
Qarorga ko‘ra, 2022-yildan boshlab har ikki yilda bir marotaba 25—30-aprel kunlari Xiva shahrida “Lazgi” xalqaro raqs festivali hamda xalqaro ilmiy-amaliy konferensiyani o‘tkaziladi. Mas’ul tashkilotlar festivalni YuNESKO shafeligi ostida o‘tkazish choralarini ko‘radi.
Qaror bilan festivalni o‘tkazish tartibi to‘g‘risidagi nizom ham tasdiqlandi. Nizomga ko‘ra, “Lazgi” raqs tanlovi 3 ta nominatsiya (“Eng yaxshi yakkaxon raqs ijrochisi”, “Eng yaxshi raqs jamoasi” va “Eng yaxshi sahnalashtirilgan raqs”) bo‘yicha baholanadi.
Tanlov g‘oliblari quyidagi miqdorda pul mukofotlari bilan taqdirlanadi:
- Gran-Pri — 7000 dollar;
- 1-o‘rin — 5000 dollar;
- 2-o‘rin — 3000 dollar;
- 3-o‘rin — 2000 dollar.
Eslatib o‘tamiz, YuNESKOning nomoddiy merosni asrash hukumatlararo qo‘mitasining 2019-yil 12-dekabr kuni bo‘lib o‘tgan 14-sessiyasida “Lazgi” raqsi Insoniyat nomoddiy merosi reprezentativ ro‘yxatiga O‘zbekiston madaniy merosining tarkibiy qismi sifatida kiritilgandi.
Izoh (0)