Haj safari uchun yig‘gan mablag‘iga mahalladoshlariga transformator olib bergan surxondaryolik hoji onaga “Mehr-saxovat” ko‘krak nishoni topshirildi

Haj safari uchun yig‘ilgan mablag‘ini mahalladoshlari uchun yangi transformator olishga sarflagan surxondaryolik hoji ona — Bibimarziya Jamilovaga “Mehr-saxovat” ko‘krak nishoni topshirildi. Bu haqda “Daryo”ga Sariosiyo tuman hokimligi axborot xizmati rahbari Murodbek Davlatov xabar berdi.

Ma’lum bo‘lishicha, Prezident Shavkat Mirziyoyevning 2020-yil 26-avgustdagi farmoniga ko‘ra, “Mehr-saxovat” ko‘krak nishoni bilan taqdirlanganlar orasida 16 nafar sariosiyolik ham bor.

“Gulobod” mahallasida yashovchi Kamoliddin hoji ota va turmush o‘rtog‘i Bibimarziya hoji ona navbatdagi Haj ziyorati uchun deb yig‘gan 70 million so‘m nafaqa pulini ‘Saxovat va ko‘mak’ umumxalq harakati doirasida o‘zlari yashayotgan mahalla aholisining elektr energiya ta’minotini yaxshilash uchun yangi zamonaviy transformatorga sarflagandi. Bugun o‘sha xayr-u saxovat o‘z mevasini berdi. Hoji ona Prezidentimiz e’tirofiga sazovor bo‘ldi”, — deydi Murodbek Davlatov.

29-sentabr kuni tuman hokimi O‘ktam To‘rayev onaxonga ko‘krak nishonni topshirgan.

“Turmush o‘rtog‘im bilan yana bir bor Haj ziyoratiga borishni niyat qilgandik, — deydi “Gulobod” mahallasida yashovchi Bibimarziya hoji aya Jamilova. — Bu yil xalqimiz boshiga og‘ir sinovlar tushdi. Shunda imkoniyatimiz darajasida qo‘limizdan kelgancha xalqimizga yordam qilishni niyat qildik. Aholi ko‘payganligi uchun elektr energiyada uzilishlar bo‘layotganligi sababli cholim yig‘gan mablag‘imizdan transformator olishni taklif qildi. Bajonidil rozi bo‘ldim. Bolalarimiz ham ma’qullashdi, hattoki yetmaganini o‘zlari qo‘shishdi. Ochig‘i buni aytishni xohlamagan edim, so‘raganingiz uchun oshkor qildim. Shu arzimas xizmatimizni Prezidentimiz e’tirof etganlaridan juda xursand bo‘ldik. Ilohim shu balolar ko‘tarilib, xalqimiz tinch va salomat bo‘lsin”.