Buxoro viloyatida 48 nafar fidoyi “Mehr-saxovat” ko‘krak nishoniga munosib ko‘rildi. E’tirof etilganlar orasida “Daryo”ning viloyatdagi muxbiri Laylo Hayitova ham bor.
Ma’lum qilinishicha, Buxoro viloyati hokimi vazifasini vaqtincha bajaruvchi Farhod Umarov 30-sentabr kuni bir guruh buxorolik tibbiyot xodimlari, tadbirkorlar, davlat va jamoat tashkilotlari vakillarini “Mehr-saxovat” ko‘krak nishoni bilan taqdirlagan.
“To‘g‘risi, kutmagandim. Ammo ishimiz e’tirof etilishidan umidvorlik bor edi. Arzimasa-da, mehnatimizni qadrlashgani uchun avvalo davlat rahbariga, qolaversa, viloyat mas’ullariga rahmat”, — deydi Laylo Hayitova.
O‘zAning yozishicha, inqirozga qarshi kurash, “Mehr va saxovat” jamg‘armasi mablag‘lari hisobidan, shuningdek, mahalliy hokimliklar, saxovatpesha insonlar tomonidan pandemiya sababli aholining murakkab ahvolga tushib qolgan qatlamlariga 8,7 milliard so‘m bevosita yo‘naltirilgan.
Ana shu ishlarda fidoyilik ko‘rsatgan o‘zbekistonlik va xorijlik fuqarolarni e’tirof etish, rag‘batlantirish maqsadida Prezident Shavkat Mirziyoyevning 2020-yil 26-avgustdagi farmoni bilan “Mehr-saxovat” ko‘krak nishoni ta’sis etilgan.
“Mamlakatda koronavirus infeksiyasi tarqalishi bilan bog‘liq epidemiologik vaziyat tahlilini, infeksiyaga chalinishning oldini olish bo‘yicha chora-tadbirlar natijalarini va boshqa yangi karantin cheklovlarining mazmun-mohiyatini, shuningdek, jamiyatda sodir bo‘layotgan voqea-hodisalarni qaysi ko‘rinishda bo‘lishidan qat’i nazar, ommaviy axborot vositalarida boricha yoritish jurnalistning birinchi galdagi ishi, — deydi Laylo Hayitova. — Kasb burchi va vazifasini nechog‘lik uddalay olish, yurtdoshlarimizning kattami, kichikmi muammosini hal etish bilan xalq vakili – jurnalistning zimmasidagi mas’uliyat bir misqol ham kamaymaydi. Demak, mas’uliyatda yana davom etamiz”.
Izoh (0)