Бухоро вилоятида 48 нафар фидойи «Меҳр-саховат» кўкрак нишонига муносиб кўрилди. Эътироф этилганлар орасида «Дарё»нинг вилоятдаги мухбири Лайло Ҳайитова ҳам бор.
Маълум қилинишича, Бухоро вилояти ҳокими вазифасини вақтинча бажарувчи Фарҳод Умаров 30 сентябрь куни бир гуруҳ бухоролик тиббиёт ходимлари, тадбиркорлар, давлат ва жамоат ташкилотлари вакилларини «Меҳр-саховат» кўкрак нишони билан тақдирлаган.
«Тўғриси, кутмагандим. Аммо ишимиз эътироф этилишидан умидворлик бор эди. Арзимаса-да, меҳнатимизни қадрлашгани учун аввало давлат раҳбарига, қолаверса, вилоят масъулларига раҳмат», — дейди Лайло Ҳайитова.
ЎзАнинг ёзишича, инқирозга қарши кураш, «Меҳр ва саховат» жамғармаси маблағлари ҳисобидан, шунингдек, маҳаллий ҳокимликлар, саховатпеша инсонлар томонидан пандемия сабабли аҳолининг мураккаб аҳволга тушиб қолган қатламларига 8,7 миллиард сўм бевосита йўналтирилган.
Ана шу ишларда фидойилик кўрсатган ўзбекистонлик ва хорижлик фуқароларни эътироф этиш, рағбатлантириш мақсадида Президент Шавкат Мирзиёевнинг 2020 йил 26 августдаги фармони билан «Меҳр-саховат» кўкрак нишони таъсис этилган.
«Мамлакатда коронавирус инфекцияси тарқалиши билан боғлиқ эпидемиологик вазият таҳлилини, инфекцияга чалинишнинг олдини олиш бўйича чора-тадбирлар натижаларини ва бошқа янги карантин чекловларининг мазмун-моҳиятини, шунингдек, жамиятда содир бўлаётган воқеа-ҳодисаларни қайси кўринишда бўлишидан қатъи назар, оммавий ахборот воситаларида борича ёритиш журналистнинг биринчи галдаги иши, — дейди Лайло Ҳайитова. — Касб бурчи ва вазифасини нечоғлик уддалай олиш, юртдошларимизнинг каттами, кичикми муаммосини ҳал этиш билан халқ вакили – журналистнинг зиммасидаги масъулият бир мисқол ҳам камаймайди. Демак, масъулиятда яна давом этамиз».
Изоҳ (0)