Андижонда мактаб битирувчиларининг 4561 нафари талаба бўлди

Андижон вилоятидаги мавжуд 764 та мактабнинг 4561 нафар битирувчиси талаба бўлди, дея хабар берди «Дарё» мухбири Умиджон Мамарасулов.

Вилоят халқ таълими бошқармаси бошлиғи Азизбек Миркомиловнинг маълумот беришича, ўтган ўқув йилида вилоятдаги мактабларни 40 298 нафар йигит-қиз тамомлаган бўлиб, шундан 38 мингтаси ўқишини ОТМда давом эттириш мақсадида ҳужжат топширган.

Битирувчиларнинг мингга яқини фан олимпиадалари, нуфузли спорт мусобақалари ва кўрик-танловларда иштирок этиб, юқори ўринларни эгаллагани учун имтиёзни қўлга киритган. 2020 йил 2—13 сентябрь кунлари ўтказилган тест синовлари натижасига кўра, 4561 нафар битирувчи ОТМ талабасига айланган.

Марҳамат туманидаги 3-давлат ихтисослаштирилган мактаб интернатини директори Маҳфуза Ўринованинг айтишича, бу йил интернатни тамомлаган 25 нафар битирувчининг барчаси тест синовларидан муваффақиятли ўтган. Уларнинг 11 нафари давлат гранти, қолган 14 нафари эса тўлов-шартномаси асосида олий таълим муассасаларига ўқишга кирган.

Қайд этилишича, бошқарма тасарруфидаги 67 та мактабнинг 190 нафар битирувчиси тест синовларидан аввал муддатидан аввал 14 та олий таълим муассасаси талабалари сафига қабул қилинган.

Вилоят халқ таълими бошқармаси ахборот хизматининг эслатишича, ўтган ўқув йилида вилоятда 40 298 нафар йигит-қиз 11-синфни тамомлаган бўлса, уларнинг 936 нафари олтин, 643 нафари эса кумуш медалга лойиқ кўрилган.