“Barselona” vingeri Usmon Dembele jamoaning 28-sentabrdagi ertalabki mashg‘ulotiga kechikdi.
Katalon klubi yangi bosh murabbiyi Ronald Kuman futbolchilar mashg‘ulot boshlanishidan bir soat avval klub bazasida bo‘lishi kerak degan qoidani joriy qilgan.
Mundo Deportivo’ning yozishicha, mashg‘ulotlar mahalliy vaqt bilan soat 11:00 da boshlanishi kerak bo‘lgan, shu sababli murabbiy jamoa soat 10:00 da yig‘ilishini kutgan. Biroq Dembele klub bazasiga 15 daqiqa kechikib, ya’ni 10:15 da yetib kelgan.
Hozircha fransiyalik futbolchiga qandaydir intizomiy choralar ko‘rilgani haqida ma’lumot berilmagan.
“Barselona” La Liganing 3-turida “Vilyarreal”ni 4:0 hisobida mag‘lubiyatga uchratdi. Mazkur o‘yin Dembele uchun 10 oy ichidagi ilk rasmiy uchrashuv bo‘ldi.
Qayd etish joiz, o‘tgan mavsumlarda ham Dembelening jamoa mashg‘ulotlariga muntazam ravishda kechikishi kuzatilardi.
Ma’lumot uchun, “Barselona” Usmonni 2017-yilning yozida 105 million yevro evaziga sotib olgan, biroq Dembele jarohatlar tufayli hamon kutilgan o‘yinni namoyish eta olmayapti.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)