Усмон Дембеле «эски касали»ни бошлади. У яна «Барселона» машғулотларига кечикди

«Барселона» вингери Усмон Дембеле жамоанинг 28 сентябрдаги эрталабки машғулотига кечикди.

Каталон клуби янги бош мураббийи Рональд Куман футболчилар машғулот бошланишидан бир соат аввал клуб базасида бўлиши керак деган қоидани жорий қилган.

Mundo Deportivo’нинг ёзишича, машғулотлар маҳаллий вақт билан соат 11:00 да бошланиши керак бўлган, шу сабабли мураббий жамоа соат 10:00 да йиғилишини кутган. Бироқ Дембеле клуб базасига 15 дақиқа кечикиб, яъни 10:15 да етиб келган.

Ҳозирча франциялик футболчига қандайдир интизомий чоралар кўрилгани ҳақида маълумот берилмаган.

«Барселона» Ла Лиганинг 3-турида «Вильярреал»ни 4:0 ҳисобида мағлубиятга учратди. Мазкур ўйин Дембеле учун 10 ой ичидаги илк расмий учрашув бўлди.

Қайд этиш жоиз, ўтган мавсумларда ҳам Дембеленинг жамоа машғулотларига мунтазам равишда кечикиши кузатиларди.

Маълумот учун, «Барселона» Усмонни 2017 йилнинг ёзида 105 миллион евро эвазига сотиб олган, бироқ Дембеле жароҳатлар туфайли ҳамон кутилган ўйинни намойиш эта олмаяпти.