O‘zbekiston bosh vaziri Abdulla Aripov boshchiligidagi hukumat delegatsiyasi Savdo-iqtisodiy hamkorlik bo‘yicha hukumatlararo komissiyaning 7-yig‘ilishida ishtirok etish uchun 2020-yil 29-sentabr kuni Tojikiston poytaxti Dushanbe shahriga tashrif buyuradi. Bu haqda Bosh vazir matbuot xizmati xabar berdi.
Ma’lum qilinishicha, komissiya kun tartibida savdo-iqtisodiy, transport-kommunikatsiya, energetika, qishloq va suv xo‘jaligi hamda madaniy-gumanitar sohalarda va boshqa ustuvor yo‘nalishlarda ikki tomonlama amaliy hamkorlikni kengaytirishning dolzarb masalalari muhokama qilish nazarda tutilmoqda.
Tashrif doirasida O‘zbekiston—Tojikiston ishbilarmon doiralari vakillari o‘rtasida biznes-forum va Ishbilarmonlar kengashining yig‘ilishini o‘tkazish rejalashtirilgan.
O‘zbekiston bosh vaziri Abdulla Aripov boshchiligidagi delegatsiya Tojikistonda bo‘lishi haqida avvalroq xabar berilgandi. Tashrif davomida Dushanbe shahrida o‘tadigan biznes-forumda Tojikiston va O‘zbekiston biznes hamjamiyatining 700 dan ortiq vakillari, ikki mamlakat bosh vazirlari Qohir Rasulzoda va Abdulla Aripov ishtirok etishi kutilmoqda.
Avvalroq O‘zbekiston va Tojikiston transport sohasi idoralari rahbarlari o‘rtasida bo‘lib o‘tgan uchrashuvda ikki tomonlama hamkorlikni mustahkamlash, shu jumladan, yangi avtotransport yo‘nalishlarini ochish masalasi muhokama qilingandi.
Izoh (0)