Qashqadaryoda moliyaviy piramida tashkil etib, 17 ta xorijiy kompaniyaning soxta aksiyalarini sotish evaziga ikki ming nafarga yaqin fuqarodan 9 million dollar yig‘ib olishda ayblanayotganlarning ikki nafari — M.R. va Sh.A. o‘zlariga nisbatan qo‘llanilgan qamoq ehtiyot chorasini o‘zgartirish bo‘yicha sudga murojaat qilgan. Bu haqda “Daryo” muxbiri bilan suhbatlashgan moliyaviy piramida tashkil etishda ayblanayotgan M.R.ning advokati Ergash Eshmurodov ma’lum qildi.
Ta’kidlanishicha, moliyaviy piramida tashkil etishda ayblanayotganlardan M.R. hamda Sh.A.ning himoyachi advokatlari sudga murojaat qilib, ayblanuvchilarga nisbatan qo‘llanilgan qamoq ehtiyot chorasini o‘zgartirishni so‘ragan.
Mazkur so‘rovga javoban 2020-yil 18-sentabr kuni Jinoyat ishlari bo‘yicha Qashqadaryo viloyat sudi advokatlar so‘rovini rad etgan va ayblanuvchilarni sudga qadar qamoqda ushlab turishga qaror qilgan. Ayblanuvchi M.R.ning yaqinlari esa u suyak chirishi kasalligi bilan og‘riganini, shuning uchun sudga qadar uni qamoqda saqlash uning sog‘lig‘i uchun xavfli ekanligini bildirmoqda.
“Turmush o‘rtog‘imni 2020-yil 14-sentabr kuni soat 16:30 da to‘y ustida olib ketishdi. Va shu kunga qadar ushlab turishibdi. Advokatlarimiz erimga nisbatan qo‘llanilgan qamoq ehtiyot chorasini o‘zgartirish uchun sudga murojaat qildi. Ammo bugun sud bu so‘rovni rad etdi”, — deydi moliyaviy piramida tashkil etishda ayblanayotgan M.R.ning turmush o‘rtog‘i Mavjuda Ro‘zimurodova.
Mavjuda Ro‘zimurodovaning ma’lum qilishicha, turmush o‘rtog‘i M.R. 10 yildan beri xasta. Suyak chirishi kasalligi bilan davolanib keladi.
“Turmush o‘rtog‘im 10 yildan beri suyak chirishi kasalligi bilan davolanib keladi. Ya’ni har doim shifokor nazoratida, ukol, dori olib turishi kerak. Shuning uchun men u kishining sog‘lig‘idan xavotirdaman”, — deydi ayblanuvchining xotini.
Moliyaviy piramida tashkil etishda ayblanayotgan T.R.ning turmush o‘rtog‘i Lola Esonova esa turmush o‘rtog‘i shug‘ullangan ish noqonuniy ekanligini bilishmaganini, mazkur chet el kompaniyasi haqida televideniyeda ham xabar berilgani uchun ishonishganini aytmoqda. Uning ta’kidlashicha, bu biznesga ko‘plab odamlar pul tikkan. Ularning orasida bugungi jamiyatning ziyoli qatlami ham bor.
Ayblanuvchi T.R.ning o‘g‘li Abbos Normamatovning aytishicha, otasini tergov qilayotgan shaxs uni urayotganini ko‘rgan.
“Tergovchi 8-10 soat tergov qildi. Shu payt yonimizdagi xonadan ‘voh’ degan ovoz chiqdi. Yugurib borsak, dadamni shu xonada turgan kishi bo‘g‘ayotgan ekan. Bu qaysi qonunda yozilgan?”, — deydi Abbos Normamatov.
Mazkur ayblovga munosabat bildirgan Qashqadaryo viloyat prokuraturasi holat o‘rganilayotganini, tez orada batafsil ma’lumot berilishini bildirdi.
Moliyaviy piramida tashkil etishda ayblanayotgan M.R.ning advokatlari — Ulash Uzoqov hamda Ergash Eshmurodovning aytishicha, sud ayblanuvchining sog‘lig‘iga e’tibor qaratib, tergov davomida ayblanuvchining tibbiy xizmatdan foydalanishi, imkoni bo‘lsa, shifoxonaga joylashtirishi lozim.
Eslatib o‘tamiz, avvalroq Qashqadaryoda soxta aksiyalarni pullab, moliyaviy piramida tashkil etgan shaxslarga jinoyat ishi qo‘zg‘atilgani, unda ayblanuvchi T.R. va boshqalar o‘zlarini go‘yoki “N” xorijiy kompaniyasining Qashqadaryo viloyatidagi rasmiy vakili sifatida tanishtirib, 17 ta xorijiy kompaniyaning soxta aksiyalarini sotish evaziga ikki ming nafarga yaqin fuqarodan jami 9 million dollar yig‘ib olgani haqida xabar berilgandi.
Mazkur holat yuzasidan qo‘shimcha ma’lumot bergan Qashqadaryo viloyat prokuraturasi T.R. va boshqalarga nisbatan Jinoyat kodeksining 168-moddasi 3-qismi “a” bandi (ko‘p miqdorda firibgarlik) hamda boshqa moddalari bilan jinoyat ishi qo‘zg‘atilganini ma’lum qildi. Viloyat prokuraturasining qo‘shimcha qilishicha, 2020-yil 15-sentabr kuni T.R., M.R. va Sh.A. gumonlanuvchi tariqasida ishtirok etishga jalb etilgan bo‘lib, ularga nisbatan sudning 2020-yil 16-sentabrdagi ajrimi bilan qamoqqa olish tarzidagi ehtiyot chorasi qo‘llanilgan.
“Daryo” voqealar rivojini kuzatishda davom etadi.
Izoh (0)