Ukraina Prezidenti Vladimir Zelenskiy Xarkov kasalxonasida An-26 samolyotining halokatidan omon qolgan yagona 20 yoshli Vyacheslav Zolochevskiy oldiga tashrif buyurdi. Bu haqda Prezidentning rasmiy saytiga tayanib Meduza xabar qildi.
Zolochevskiyning ahvoli o‘rtacha darajada baholanmoqda. U o‘z hushida. Yigit Ukraina prezidentiga hamma narsa tezda yuz berganini va nima bo‘layotganini anglayolmagani haqida aytdi.
Zolochevskiyning ta’kidlashicha, kursantlar va ekipaj a’zolari avvaldan tanish bo‘lishgan.
Tirik qolgan kursant Xarkov viloyati rahbari Aleksey Kucher bilan ham suhbatlashdi.
“U hamma narsa xuddi kompyuter o‘yinlaridagi kabi bo‘lganini, o‘ziga kelganida do‘stining yonayotganini ko‘rganini va aslida bu yigitning olovini o‘chirishda yordam berganini aytdi. Do‘sti kecha kasalxonada edi va afsuski, bugun vafot etdi”, – dedi Kucher.
Mavzuga doir: Ukrainada aviahalokat sabablari aniqlanmaguncha barcha An-26 samolyotlarining parvozi to‘xtatiladi
“U hamma narsani eslamaydi, ma’lum bir bosqichda hushidan ketgan. U hushiga kelganidan so‘ng, hozirgi tushunchamizga ko‘ra samolyot qoldiqlarini tark etib, hamkasbidagi alangani o‘chira boshlagan. U samolyotning ichida tirik qolgan”, – dedi Kucher.
Vyacheslav Zolochevskiy – Xarkov milliy havo kuchlari universitetining uchinchi bosqich talabasi. Ukrinform xabariga ko‘ra, shifokorlar uning bir nechta ko‘karishlar va miya chayqalishi borligini aniqladilar. Shuningdek, yigit oyog‘idan jarohat olgan. U kelasi haftada kasalxonadan chiqarilishi mumkinligi ta’kidlandi.
Izoh (0)