Qozog‘istonda bir hafta ichida yana 5837 kishida, Qirg‘izistonda esa 755 kishida koronavirus aniqlandi

Qozog‘istonda o‘tgan bir hafta ichida koronavirus infeksiyasi bilan kasallanganlar soni 5837 kishiga ortib, mamlakatdagi jami kasallar soni 107 659 kishiga yetdi. Bu haqda Sog‘liqni saqlash vazirligiga tayanib, Tengrinews xabar berdi.

Hozirga qadar COVID-19 infeksiyasini yuqtirib olgan bemorlarning 102 659 nafari sog‘aygan, 1719 kishi koronavirus asoratlari oqibatida vafot etgan. Shuningdek, Qozog‘istonda 1-avgustdan buyon pnevmoniya bilan kasallanish bo‘yicha 32 233 ta holat qayd etilgan bo‘lib, bemorlarning 347 nafari vafot etgan.

Koronavirusga chalinish bo‘yicha holatlar quyidagi hududlarda aniqlangan:

• Olmaota shahri — 14 367;
• Nur-Sulton shahri — 14 064;
• Atirau viloyati — 11 072;
• Qarag‘anda viloyati — 10 251;
• Sharqiy Qozog‘iston viloyati — 8661;
• G‘arbiy Qozog‘iston viloyati — 6852;
• Chimkent shahri — 5188;
• Olmaota viloyati — 4957;
• Jambil viloyati — 4122;
• Shimoliy Qozog‘iston — 4076;
• Pavlodar viloyati — 3901;
• Kostanay viloyati — 3478;
• Aqmo‘la viloyati — 3476;
• Turkiston viloyati — 3374;
• Mang‘istov viloyati — 3338;
• Qizilo‘rda viloyati — 3242;
• Aqto‘be viloyati — 3240.

Avvalroq Qozog‘istonda COVID-19’ga chalingan 1,9 mingdan ortiq tibbiyot xodimiga tovon puli to‘lanishi to‘g‘risida xabar berilgandi.

Qirg‘izistonda 19-sentabrdan 26-sentabrga qadar koronavirus bilan kasallanish bo‘yicha yana 755 ta holat aniqlandi. Bu haqda mamlakat Sog‘liqni saqlash vazirligiga tayanib, Kloop xabar berdi.

Koronavirusga chalinish bo‘yicha holatlar quyidagi hududlarda aniqlangan:

• Chuy viloyati — 4839;
• O‘sh viloyati — 3688;
• Jalolobod viloyati — 3428;
• Issiqko‘l viloyati — 3081;
• Botken viloyati — 1792;
• Norin viloyati — 1562;
• Talas viloyati — 1263.

Mamlakatda pandemiya boshlangandan buyon COVID-19 aniqlanganlar soni 46 090 kishini tashkil etmoqda.

Qirg‘izistonda hozirga qadar koronavirus infeksiyasi oqibatida vafot etganlar soni 1063 kishiligicha qolmoqda. O‘tgan ikki hafta ichida ushbu ko‘rsatkich o‘zgarmagan. Statistikaga kiritilgan bu kabi o‘zgartirish SSV tomonidan amalga oshirilgan bo‘lib, yondosh kasallikka ega, xususan, yurak kasalligi bor 400 ta holat olib tashlangan. Shu bilan birga, vazirlik statistikani JSST metodikasi bo‘yicha qayta hisoblashga va’da bergan.

Afg‘onistonda o‘tgan bir hafta ichida yana 6610 kishida koronavirus infeksiyasi aniqlandi. Bu haqda mamlakat Sog‘liqni saqlash vazirligiga tayanib, Tolo News xabar berdi.

Afg‘onistonda pandemiya boshlanganidan buyon COVID-19 bilan kasallanganlarning umumiy soni 39 186 kishiga yetgan, hozirga qadar 32 619 kishi davolangan, 1451 kishi virus qurboniga aylangan (o‘tgan bir sutkada birorta o‘lim holati qayd etilmagan).

Mamlakatdagi markazlarida hozirga qadar 109,7 mingdan ortiq test namunalari olingan.

Tojikistonda so‘nggi bir hafta davomida koronavirus bilan kasallanganlar soni 9562 kishiga yetdi. Bu haqda mamlakat Sog‘liqni saqlash vazirligiga tayanib, Asia Plus xabar berdi.

O‘tgan bir hafta ichida yana 1536 kishida COVID-19 aniqlangan. Hozirga qadar virus qurbonlari soni 74 kishiga yetgan (bir hafta davomida bir kishi vafot etgan), 8341 kishi kasallikdan davolangan.

Avvalroq Tojikiston Sog‘liqni saqlash vazirligi mamlakatda bolalarning koronavirus bilan kasallanayotganini tasdiqlagani to‘g‘risida xabar berilgandi.

O‘zbekistonda 26-sentabr soat 10:00 holatiga ko‘ra, koronavirus infeksiyasi qayd etilganlar soni 54 660 nafarni tashkil etmoqda. Bu haqda Sog‘liqni saqlash vazirligi xabar berdi. Hozirga qadar mamlakatda 50 954 nafar koronavirus infeksiyasiga chalingan fuqaro (93 foiz) sog‘aygan. Ayni paytda 3255 nafar bemorga shifokorlar tomonidan belgilangan standartlar bo‘yicha davo choralari ko‘rilmoqda. Ulardan 718 nafari og‘ir, 289 nafari esa o‘ta og‘ir ahvolda.