Украина Президенти Владимир Зеленский Харьков касалхонасида Ан-26 самолётининг ҳалокатидан омон қолган ягона 20 ёшли Вячеслав Золочевский олдига ташриф буюрди. Бу ҳақда Президентнинг расмий сайтига таяниб Meduza хабар қилди.
Золочевскийнинг аҳволи ўртача даражада баҳоланмоқда. У ўз ҳушида. Йигит Украина президентига ҳамма нарса тезда юз берганини ва нима бўлаётганини англаёлмагани ҳақида айтди.
Золочевскийнинг таъкидлашича, курсантлар ва экипаж аъзолари аввалдан таниш бўлишган.
Тирик қолган курсант Харьков вилояти раҳбари Алексей Кучер билан ҳам суҳбатлашди.
«У ҳамма нарса худди компьютер ўйинларидаги каби бўлганини, ўзига келганида дўстининг ёнаётганини кўрганини ва аслида бу йигитнинг оловини ўчиришда ёрдам берганини айтди. Дўсти кеча касалхонада эди ва афсуски, бугун вафот этди», – деди Кучер.
Мавзуга доир: Украинада авиаҳалокат сабаблари аниқланмагунча барча Ан-26 самолётларининг парвози тўхтатилади
«У ҳамма нарсани эсламайди, маълум бир босқичда ҳушидан кетган. У ҳушига келганидан сўнг, ҳозирги тушунчамизга кўра самолёт қолдиқларини тарк этиб, ҳамкасбидаги алангани ўчира бошлаган. У самолётнинг ичида тирик қолган», – деди Кучер.
Вячеслав Золочевский – Харьков миллий ҳаво кучлари университетининг учинчи босқич талабаси. Укринформ хабарига кўра, шифокорлар унинг бир нечта кўкаришлар ва мия чайқалиши борлигини аниқладилар. Шунингдек, йигит оёғидан жароҳат олган. У келаси ҳафтада касалхонадан чиқарилиши мумкинлиги таъкидланди.
Изоҳ (0)