Ukraina prezidenti Vladimir Zelenskiy Xarkov yaqinidagi aviahalokatda halok bo‘lganlar xotirasiga 26-sentabrni motam kuni deb e’lon qilish to‘g‘risidagi farmonni imzoladi, deya xabar bermoqda “Korrespondent”.
“Kecha dahshatli fojia – Chuguyev yaqinidagi An-26 samolyotining qulashi natijasida Ukraina 26 nafar munosib o‘g‘lini yo‘qotdi. 25 kishi voqea joyida vafot etdi, biri kasalxonada hayotdan ko‘z yumdi. Bir kishi davolanmoqda. Biz uning tezroq sog‘ayib ketishi uchun duo qilamiz.
Biz hali butun hayoti oldinda bo‘lgan yosh kursantlar va tajribali harbiylarni yo‘qotdik. Bu yo‘qotish dardini ifoda etadigan so‘zlarni topish qiyin. Ularning ota-onalari, turmush o‘rtoqlari va farzandlariga tasalli beradigan gaplarni topish qiyin.
Bugun butun mamlakat o‘z oilalari bilan motamda bo‘ladi. Men 26-sentabrni motam kuni deb e’lon qilish to‘g‘risida farmon imzoladim”, – deb yozgan Zelenskiy Telegram kanalida.
Uning ta’kidlashicha, davlat jarohat olgan kursantga davolanishi va yaqinlarini yo‘qotganlarga tovon puli to‘lashi kerak.
“Ukraina o‘z qahramonlarini unutmaydi. Men ushbu samolyot halokatining sabablarini zudlik bilan aniqlashni hamda tergov obyektiv va xolis o‘tkazilishini talab qilaman”, – deya xulosa qildi Zelenskiy.
OAV prezidentning halokatga uchragan joyga allaqachon yetib kelganini xabar qilmoqda. Uning so‘zlariga ko‘ra, bosh vazir Denis Shmigal aviahalokat tufayli hukumatning favqulodda yig‘ilishini tayyorlamoqda.
Avvalroq An-26 halokatida omon qolganlardan biri kasalxonada vafot etgani haqida xabar qilindi. Shifokor tirik qolgan ikkinchi kursantning holati yaxshi ekanini ma’lum qilgan.
Samolyotning “qora quti”si hali topilmadi.
Prezident barcha An-26 samolyotlari parvozini to‘xtatdi
Ma’lum qilinishicha, Zelenskiy An-26 reyslarini to‘xtatib turish haqida buyruq berdi. Bu haqda 26-sentabr kuni Ukraina prezidenti devoni rahbarining o‘rinbosari Oleg Tatarov mamlakat telekanallari efirida ma’lum qildi.Unga ko‘ra, Xarkov viloyatidagi aviahalokat sabablari aniqlanmaguncha, barcha An-26 samolyotlarining parvozlari to‘xtatiladi.
“Prezident fojia sabablari aniqlanmaguncha shu kabi samolyotlar ishtirokidagi har qanday parvozlarni to‘xtatish to‘g‘risida buyruq berdi. Mudofaa vaziri va bosh shtab boshlig‘i buyruqni bajarishni boshladi. Menimcha, nima sodir bo‘lganligi xolisona aniqlanmaguncha bunday reyslar bo‘lmaydi”, – dedi Tatarov.
O‘z navbatida bosh vazir Denis Shmigal mudofaa vaziri Andrey Taranga tergov davomida o‘quv parvozlarini amalga oshirganlarni ishdan chetlatishni buyurdi.
“Mudofaa vaziriga tergovning xolisligini ta’minlashni buyuraman. Tergov paytida o‘quv parvozlari uchun mas’ul shaxslar ishdan bo‘shatiladi”, – dedi Shmigal.
U tegishli buyruqni 26-sentabr kuni Vazirlar Mahkamasining favqulodda yig‘ilishida berdi.
Izoh (0)