O‘zbekistonda 2020/2021-o‘quv yili uchun o‘tkazilgan kirish imtihonlarida ko‘plab yo‘nalishlarda 189 ball olgan abituriyentlar grantga kira olmay, kontraktga tavsiya etilgani jamoatchilikda e’tirozlarni keltirib chiqarmoqda. Huquqshunos va bloger Xushnudbek Xudoyberdiyev ushbu masalaga e’tibor qaratdi.
DTM bergan rasmiy bayonotga ko‘ra, Vazirlar Mahkamasi 2008-yilning 13-oktabridagi qarori bilan sportchilar mavjud kvota ichida qabul qilinishi kerak. Haqiqatan ham 12 yil oldingi hujjatda shunday yozilgan. Ammo 2020-yil 24-yanvar kuni Prezident farmoni qabul qilingan.
Farmonning 12-bandiga ko‘ra, “O‘zbekiston Respublikasi Jismoniy tarbiya va sport vazirligi, Xalq ta’limi vazirligi, Oliy va o‘rta maxsus ta’lim vazirligi, Moliya vazirligining 2020-yil 1-fevraldan boshlab sport sohasidagi yutuqlarni munosib ravishda rag‘batlantirishni nazarda tutuvchi quyidagi takliflariga rozilik berilgan:
a) olimpiya va paralimpiya sport turlari bo‘yicha Olimpiya va Paralimpiya hamda Osiyo va Paraosiyo o‘yinlari, jahon, Osiyo va respublika chempionatlarida oxirgi uch yilda g‘olib va sovrindor (1—3-o‘rin) bo‘lgan sportchi-o‘quvchilarni O‘zbekiston Respublikasi davlat budjeti mablag‘lari hisobidan moliyalashtiriladigan oliy ta’lim muassasalariga (tibbiyot yo‘nalishidan tashqari) qo‘shimcha davlat granti asosida imtihon sinovlarisiz qabul qilish.
“Ko‘rib turganingizdek, prezident farmonida sportchilarga qo‘shimcha davlat granti ajratilishi belgilab qo‘yilgan. Ya’ni ular boshqa bilimlilarga xalaqit bermasligi kerak edi. ‘Normativ-huquqiy hujjatlar to‘g‘risida’gi qonunga ko‘ra, Prezident farmoni Vazirlar Mahkamasi qaroridan ustun turadi va 2 xil qoida keltirilgan bo‘lsa, farmonda belgilangani kuchga ega bo‘ladi. Shunga ko‘ra, kvota ichida qabul qilingan barcha sportchilarga qo‘shimcha grant ajratilishi kerak va natijada qolganlarning o‘rni qayta hisoblanishi lozim, deb hisoblayman”, — deb yozmoqda huquqshunos.
Shuningdek, ijtimoiy tarmoqlarda Jismoniy tarbiya va sport vaziri 18-sentabr kuni imzolagan xat nusxasi tarqalganiga ham munosabat bildirdi. Haqiqiyligi hozircha rasman tasdiqlanmagan ushbu xatga vazirlik imtiyoz berilishi kerak bo‘lgan sportchilar ro‘yxatini ilova qilgan hamda ular umumiy qabul parametrlaridan tashqari qo‘shimcha davlat granti asosida o‘qishga qabul qilinishi haqida yozilgan. Huquqshunos mazkur holat bo‘yicha mas’ul tashkilotlardan rasmiy izoh so‘ragan.
“Lekin yana bir narsa, agar barcha sportchilar qo‘shimcha kvotaga o‘tkazilgani bilan, 189 ball olganlar grantga kirishiga to‘sqinlik qiladigan yana bir toifa imtiyozchilar baribir saqlanib qolishi mumkin. Bular ‘Temurbeklar maktabi’ bitiruvchilari bo‘lib, ularga qo‘shimcha ball beriladi va ularning ko‘pchiligining ballari 189 balldan oshib ketgan. Ha, shunaqa, O‘zbekiston ana shunday mantiqsiz imtiyozlar mamlakati. Bu mavzuga yana qaytamiz”, — deya o‘z fikrini yakunlagan Xushnudbek Xudoyberdiyev.
Eslatib o‘tamiz, O‘zbekistonda 2020/2021-o‘quv yili uchun o‘tkazilgan test sinovlari natijalariga ko‘ra, respublika OTMlari bakalavriatiga jami 140 068 nafar abituriyent talabalikka qabul qilindi. Davlat granti asosida o‘rtacha o‘tish bali — 133,3 ballni, to‘lov-kontrakt asosida o‘rtacha o‘tish bali — 110,6 ballni tashkil etdi.
O‘zbekiston OTMlariga qabul bo‘yicha o‘tkazilgan test natijalaridan qoniqmaganlar uchun DTMning apellyatsiya komissiyasi o‘z faoliyatini 2020-yil 28-sentabrdan boshlaydi.
Bazaviy to‘lov-kontrakt asosida talabalikka tavsiya etilmagan, lekin 56,7 ball va undan yuqori ball to‘plagan abituriyentlar tabaqalashtirilgan to‘lov-kontrakt asosida o‘qish uchun 2020-yil 26-sentabrdan boshlab oliy ta’lim muassasalariga murojaat etishi mumkin.
Izoh (0)