Namangan viloyati hokimi vazifasini bajaruvchi Shavkatjon Abdurazzoqov faoliyatining ilk kunida Namangan shahridagi koronavirusni davolashga ixtisoslashgan shifoxonalar bilan tanishdi. Bu haqda “Daryo” muxbiri Azizbek Abduvaliyev xabar bermoqda.
Viloyat rahbari Namangan shahridagi 2-BO‘SM binosida joylashgan saralash va taqsimlash markazida bo‘ldi. Bu yerda maxsus kiyim-bosh kiyib, palatalarni birma-bir aylandi, bemorlar holidan xabar oldi.
Mazkur markazda davolanayotgan Uychi tumani tez tibbiy yordam bo‘limi xodimi Robiya Og‘aliqova hokim bilan muloqoti chog‘ida ikki farzandi oliy o‘quv yurtida to‘lov-kontrakt asosida tahsil olayotganini aytib o‘tdi. Shavkatjon Abdurazzoqov mutasaddilarga shartnoma pullari to‘lovini amalga oshirishda ko‘mak berishni topshirdi.
Shuningdek, viloyat rahbari markaz xodimlari bilan suhbatlashib, bu yerda to‘laqonli faoliyat olib borish uchun qanday yordam zarurligini so‘radi. Muammo va takliflarni tinglab, ularni bartaraf etish yuzasidan ko‘rsatmalar berdi.
Shavkatjon Abdurazzoqov viloyat sog‘liqni qayta tiklash markazida Namanganga koronavirusni bartaraf etishda ko‘mak berish uchun kelgan bir guruh rossiyalik shifokorlar bilan uchrashdi. Kasallikni samarali davolash borasidagi fikrlari bilan qiziqib, shifoxonalardan birini ularning tavsiyalari asosida qayta jihozlash zarurligini ta’kidladi.
Izoh (0)