Sigirlar va cho‘chqalardan chiqadigan gazlar global isishga avtomobillardan ko‘ra ko‘proq ta’sir ko‘rsatishi ma’lum qilindi

Greenpeace xalqaro tashkiloti sigirlar, cho‘chqa va boshqa uy hayvonlaridan chiqadigan issiqxona gazlari darajasi global isishga avtomobil sanoatidan ko‘ra ko‘proq ta’sir ko‘rsatishiga oid yangi hisobotini e’lon qildi, deb xabar beradi Motor.

Greenpeace’ning hisobotida yozilishicha, sigirlardan ajraladigan issiqxona gazlari Yevropa Ittifoqidagi barcha avtomobillarning tabiatga ko‘rsatadigan effektidan yuqori. Ekologlarning fikricha, Yevropa Ittifoqi aholisining barchasi elektromobillarga o‘tgan taqdirda ham, hayvonlardan chiqadigan karbonat angidrid gazi ekologik vaziyatni yomonlashtirishda davom etaveradi.

BMTning 2018-yilgi hisobotiga ko‘ra, Yevropa hududidagi sigirlar 502 million tonnaga yaqin karbonat angidrid gazini chiqargan. O‘sha yili avtomobillarda esa ushbu ko‘rsatkich 656 million tonnani tashkil etgan. Biroq hayvonlar uchun ozuqa yetishtirish va ishlab chiqarish, shuningdek, o‘rmonlarni yo‘q qilish natijasida hosil bo‘lgan zararli gazlarning chiqishi hisobga olinsa, atrof-muhitga yetkazilgan umumiy zarar taxminan 70 million tonna metanni tashkil etdi.

Bundan tashqari, ekologlar go‘sht iste’molidan ham havotirda, 2007—2018-yillar oralig‘ida dunyoda go‘shtga bo‘lgan talab 9,5 foizga oshgan. Shu sababli issiqxona gazlari miqdori 6 foizga oshgan.