Greenpeace халқаро ташкилоти сигирлар, чўчқа ва бошқа уй ҳайвонларидан чиқадиган иссиқхона газлари даражаси глобал исишга автомобиль саноатидан кўра кўпроқ таъсир кўрсатишига оид янги ҳисоботини эълон қилди, деб хабар беради Motor.
Greenpeace’нинг ҳисоботида ёзилишича, сигирлардан ажраладиган иссиқхона газлари Европа Иттифоқидаги барча автомобилларнинг табиатга кўрсатадиган эффектидан юқори. Экологларнинг фикрича, Европа Иттифоқи аҳолисининг барчаси электромобилларга ўтган тақдирда ҳам, ҳайвонлардан чиқадиган карбонат ангидрид гази экологик вазиятни ёмонлаштиришда давом этаверади.
БМТнинг 2018 йилги ҳисоботига кўра, Европа ҳудудидаги сигирлар 502 миллион тоннага яқин карбонат ангидрид газини чиқарган. Ўша йили автомобилларда эса ушбу кўрсаткич 656 миллион тоннани ташкил этган. Бироқ ҳайвонлар учун озуқа етиштириш ва ишлаб чиқариш, шунингдек, ўрмонларни йўқ қилиш натижасида ҳосил бўлган зарарли газларнинг чиқиши ҳисобга олинса, атроф-муҳитга етказилган умумий зарар тахминан 70 миллион тонна метанни ташкил этди.
Бундан ташқари, экологлар гўшт истеъмолидан ҳам ҳавотирда, 2007—2018 йиллар оралиғида дунёда гўштга бўлган талаб 9,5 фоизга ошган. Шу сабабли иссиқхона газлари миқдори 6 фоизга ошган.
Изоҳ (0)