Farg‘ona viloyati hokimi vazifasini bajaruvchi Xayrullo Bozorov ijtimoiy tarmoqlardagi sahifalarida Namangan xalqiga ehtiromini bildiruvchi maktub qoldirdi. Bu haqda “Daryo” muxbiri Azizbek Abduvaliyev xabar bermoqda.
Bozorovga ko‘ra, Namanganda davlat rahbarining viloyatga tashriflari davomida berilgan topshiriq, ko‘rsatilgan yo‘l-yo‘riqlar tufayli barcha jabhalarda salmoqli yutuqlarga erishildi. Bularning barchasiga viloyat faollari bilan yelkama-yelka, bir yoqadan bosh chiqarib ishlashning natijasida erishilgan.
“Viloyat iqtisodiyotini rivojlantirishga, yangi ish o‘rinlari yaratishga, qishloq va mahallalarni obodonlashtirishga hissa qo‘shgan fidoyi tadbirkorlarga, bunyodkorlarga, xalq ta’limi, sog‘liqni saqlash xodimlariga, hamisha va har ishda boy hayotiy tajribalari, pand-u nasihatlari va duolari bilan qo‘llab turgan farishtali nuroniylarimizga, qizg‘in jarayonlarni tezkorlik va xolislik bilan yoritib borayotgan ommaviy axborot vositalari xodimlariga, g‘ayrat va shijoati, bilim va salohiyati bilan fan olimpiadalarida, sport musobaqalarida, xalqaro tanlovlarda g‘oliblikni qo‘lga kiritib, Namanganimiz sharafini yuksaklarga ko‘targan iste’dodli yoshlarga va ularning ustozlariga rahmatlar aytaman”, deyiladi maktubda.
Xayrullo Bozorov Namangan ahliga minnatdorligi, yuksak ehtiromini bildirgan va ta’zim qilishini ta’kidlagan.
“Betakror Vatanimiz ravnaqi yo‘lida sadoqat bilan xizmat qilishdan hech qachon tolmaylik, charchamaylik! Barchangizni yaxshi ko‘raman!” deyiladi maktub so‘ngida.
Ma’lumot uchun, Xayrullo Bozorov 2015—2020-yillar davomida Namangan viloyatiga rahbarlik qilgan. 2020-yil 25-sentabr kuni Farg‘ona viloyati hokimi vazifasini bajaruvchi etib tayinlandi.
Izoh (0)