Фарғона вилояти ҳокими вазифасини бажарувчи Хайрулло Бозоров ижтимоий тармоқлардаги саҳифаларида Наманган халқига эҳтиромини билдирувчи мактуб қолдирди. Бу ҳақда «Дарё» мухбири Азизбек Абдувалиев хабар бермоқда.
Бозоровга кўра, Наманганда давлат раҳбарининг вилоятга ташрифлари давомида берилган топшириқ, кўрсатилган йўл-йўриқлар туфайли барча жабҳаларда салмоқли ютуқларга эришилди. Буларнинг барчасига вилоят фаоллари билан елкама-елка, бир ёқадан бош чиқариб ишлашнинг натижасида эришилган.
«Вилоят иқтисодиётини ривожлантиришга, янги иш ўринлари яратишга, қишлоқ ва маҳаллаларни ободонлаштиришга ҳисса қўшган фидойи тадбиркорларга, бунёдкорларга, халқ таълими, соғлиқни сақлаш ходимларига, ҳамиша ва ҳар ишда бой ҳаётий тажрибалари, панд-у насиҳатлари ва дуолари билан қўллаб турган фариштали нуронийларимизга, қизғин жараёнларни тезкорлик ва холислик билан ёритиб бораётган оммавий ахборот воситалари ходимларига, ғайрат ва шижоати, билим ва салоҳияти билан фан олимпиадаларида, спорт мусобақаларида, халқаро танловларда ғолибликни қўлга киритиб, Наманганимиз шарафини юксакларга кўтарган истеъдодли ёшларга ва уларнинг устозларига раҳматлар айтаман», дейилади мактубда.
Хайрулло Бозоров Наманган аҳлига миннатдорлиги, юксак эҳтиромини билдирган ва таъзим қилишини таъкидлаган.
«Бетакрор Ватанимиз равнақи йўлида садоқат билан хизмат қилишдан ҳеч қачон толмайлик, чарчамайлик! Барчангизни яхши кўраман!» дейилади мактуб сўнгида.
Маълумот учун, Хайрулло Бозоров 2015—2020 йиллар давомида Наманган вилоятига раҳбарлик қилган. 2020 йил 25 сентябрь куни Фарғона вилояти ҳокими вазифасини бажарувчи этиб тайинланди.
Изоҳ (0)