Xayrullo Bozorov Farg‘ona viloyati hokimi vazifasini bajaruvchi etib tayinlandi. Bu haqda 25-sentabr kuni Prezident administratsiyasi rahbari Zaynilobiddin Nizomiddinov va O‘zbekiston bosh vaziri Abdulla Aripov boshchiligida Farg‘ona shahrida bo‘lib o‘tgan viloyat faollar yig‘ilishida ma’lum qilindi.

Xayrullo Bozorov.

Foto: Farg‘ona viloyati hokimligi axborot xizmati

Yig‘ilishda viloyatga 2011-yildan buyon rahbarlik qilib kelgan Shuhrat G‘aniyev boshqa ishga o‘tayotgani munosabati bilan viloyat hokimi lavozimidan ozod etilgani to‘g‘risidagi Prezident farmoni o‘qib eshittirilgan. Davlat rahbarining boshqa farmoni bilan shu kungacha Namangan viloyati hokimi lavozimida ishlab kelgan Xayrullo Bozorov Farg‘ona viloyati hokimi vazifasini bajaruvchi etib tayinlangani bildirilgan.

Xayrullo Bozorov, Zaynilobiddin Nizomiddinov va Abdulla Aripov.

Foto: Farg‘ona viloyati hokimligi axborot xizmati

Avvalroq O‘zbekiston Ekologiya va atrof-muhitni muhofaza qilish davlat qo‘mitasi raisi lavozimida ishlab kelgan Shavkatjon Abdurazzoqov Namangan viloyati hokimi etib tayinlangani ma’lum bo‘lgandi. Shuhrat G‘aniyev bosh vazirning agrar va oziq-ovqat sohalarini rivojlantirish masalalari bo‘yicha o‘rinbosari lavozimini egallashi kutilmoqda.