Koronavirusga qarshi kurash shtabi a’zosi Sevara Ubaydullayeva grippga qarshi vaksina olish mumkin bo‘lmagan holatlar va COVID-19 oqibatida pnevmoniyaga chalinib tuzalganlarga uni olish mumkinligi borasida ma’lumot bergan.
Mutaxassisning so‘zlariga ko‘ra, quyidagi kasalliklar guruhiga kiruvchilarni grippga qarshi vaksina bilan emlash mumkin emas:- OITS kasalligining turli bosqichlari: avj olgan yoki surunkali holatlarida;
- Vaksina tarkibidagi adyuvant, ya’ni vaksina ishlab chiqilgan asosiy vosita va qo‘shimchalariga nisbatan allergik holat;
- Bolalarda miyaning organik qismida o‘zgarish keltirib chiqaruvchi nevrologik kasalliklarning zo‘rayib borishi davri;
- Barcha somatik kasalliklar avj olish davri (tana harorati 38 darajadan ko‘tarilishi, diareya, ich ketish, qusish, tutqanoqlar, qon bosimi ko‘tarilishi yoki tushishi, kuchli og‘riq sindromida va hokazo) o‘tib ketganidan keyin shifokor ko‘rigidan o‘tib, sog‘lom, deb tashxis qo‘yilganida, tibbiyot muassasasida shifokor-immunolog, pediatr yoki terapevt nazorati ostida emlanish kerak.
Ma’lumot uchun, grippga qarshi vaksina ushbu kasallikning har yili uchrashi mumkin bo‘lgan shtammlariga qarshi ishlab chiqiladi va yilda bir marta emlash o‘tkaziladi. Vaksina inson organizmiga kirganida aynan grippning shu shtammlariga qarshi immunitet hosil qilishga yordam beradi.
Eslatib o‘tamiz, avvalroq koronavirusga qarshi kurash shtabi a’zosi Barno Abdusamatova grippga qarshi vaksina olish darajasining ortishi kuz—qish mavsumida aholi orasida nafas yo‘li kasalliklari va COVID-19 pandemiyasi paytida sog‘liqni saqlash tizimiga bo‘layotgan zo‘riqishni kamaytirishini bildirgani, O‘zbekistonda 1 milliondan ortiq kontingent grippga qarshi bepul emlanishi, gripp va pnevmoniyaga qarshi emlash bo‘yicha chora-tadbirlar rejasi hukumatga taqdim etilgani, sentabr oyidan emlash ishlari boshlanishi haqida ham xabarlar berilgan.
Izoh (0)