Buxoro viloyatida 2020-yil 27-aprel kuni kuzatilgan kuchli shamol va yog‘ingarchilik 141,6 milliard so‘mlik zarar yetkazgan. Shu munosabat bilan Prezident ko‘rsatmasiga muvofiq tabiiy ofat oqibatlarini bartaraf etish maqsadida banklar foizsiz kredit ajratishni yo‘lga qo‘ygan. Biroq, DXX Buxoro viloyati boshqarmasi va Iqtisodiy jinoyatlarga qarshi kurashish departamenti o‘rganishlariga ko‘ra, kreditlar maqsadli foydalanilmagan.
O‘rganish natijalariga ko‘ra Jinoyat kodeksining 167-moddasi 3-qismi “a” bandi (o‘zlashtirish yoki rastrata yo‘li bilan talon-toroj qilish) bilan jinoyat ishi qo‘zg‘atilgan. DXXdan ma’lum qilishlaricha, jinoyat ishi doirasida tergovga gumon qilinuvchi tariqasida jalb qilinganlar orasida “O‘zsanoatqurilishbank” xodimlari ham bor.
Ta’kidlanishicha, “O‘zsanoatqurilishbank” bosh ofisi xodimi O.T. hamda shu bankning “To‘qimachilik” filiali boshqaruvchisi A.Q. o‘z nomida bo‘lgan issiqxonalar bo‘yicha, ularga zarar yetmagan bo‘lsa-da, “jiddiy talofat ko‘rgan” degan mazmunda qalbaki hujjatlar tayyorlab, aksiyadorlar kengashini ogohlantirmay, jami 2 milliard so‘mlik foizsiz kredit mablag‘larini o‘z issiqxonalari hisob raqamiga o‘tkazganlikda gumon qilinmoqda.
Tergov harakatlari davom etmoqda.
Izoh: Xabarning dastlabki varianti bankning hali sudi bo‘lmagan ikki xodimi go‘yoki aybdorligi rad etib bo‘lmas darajada isbotlangandek taassurot qoldiradigan mazmunda, aybsizlik prezumpsiyasi tamoyiliga zid ravishda tayyorlangani bois ushbu xabar 2021-yil 6-mart kuni tahrirlandi. “Daryo” tahririyati manba bergan birlamchi ma’lumotga tayanib tayyorlangan mazkur xabar sabab yetkazilgan noqulayliklar uchun mushtariylardan uzr so‘raydi.
Izoh (0)